Toshkentda “Qora libosli ayol tashrifi” kitobi taqdimoti o‘tkazildi
Tadbir doirasida adabiy chiqishlar, sahna ko‘rinishi va kitob imzolash marosimi tashkil etildi.
Toshkentdagi Haydar Aliyev nomidagi Ozarbayjon Madaniyat Markazida ozarbayjon xalq yozuvchisi Maqsud Ibrohimbekovning “Qora libosli ayol tashrifi” asarining o‘zbek tilidagi nashri taqdimoti bo‘lib o‘tdi.
Mazkur nashr Ozarbayjon Madaniyat vazirligi hamda Ozarbayjonning O‘zbekistondagi elchixonasi huzuridagi Haydar Aliyev nomidagi Ozarbayjon Madaniyat Markazi hamkorligida tayyorlangan.
Tadbirda ilm-fan va adabiyot vakillari, madaniyat arboblari, talabalar hamda Ozarbayjon diasporasi vakillari ishtirok etdi.
Dastlab yozuvchining hayoti va ijodiga bag‘ishlangan videolavha namoyish qilindi.
Madaniyat markazi direktori Akif Marifli ushbu nashr Ilhom Aliyev tashabbusi bilan yozuvchining 90 yillik yubileyi doirasida amalga oshirilganini ta’kidladi. U mazkur asar inson ruhiyati va hayot dramalarini chuqur badiiy ifoda etuvchi muhim adabiy asarlardan biri ekanini qayd etdi.
Tadbir davomida adabiyotshunoslar Jamila Shermuhammedova va Erkin Nuriddinov asarning badiiy qiymati va psixologik chuqurligiga alohida to‘xtalib o‘tdilar. Shuningdek, tarjimon Shahlo Qosimova ushbu nashr ikki xalq o‘rtasidagi adabiy aloqalarni yanada mustahkamlashga xizmat qilishini ta’kidladi.
Tadbirda yozuvchining turmush o‘rtog‘i Anna Ibrohimbekova ham ishtirok etib, muallif ijodi haqida o‘z fikrlarini bildirdi.
Shuningdek, Xaribulbul teatri jamoasi tomonidan sahna ko‘rinishi namoyish etildi, Qorabog‘ Zafari raqs ansambli esa milliy raqslar bilan chiqish qildi.
Tadbir yakunida kitobxonlar uchun kitob imzolash marosimi tashkil etildi.
