Tramp “Alkatraz” qamoqxonasini qayta ochmoqchi

AQSh prezidenti Donald Tramp sobiq Alkatraz orolidagi “Alkatraz” qamoqxonasini qayta tiklash uchun Kongressdan 152 million dollar ajratishni so‘radi. Bu haqda Oq uy tomonidan e’lon qilingan 2027-yilgi byudjet loyihasiga tayanib, DW xabar bermoqda.

 

Ma’lum qilinishicha, hujjat hali AQSh Kongressi tomonidan tasdiqlanishi lozim. Rejaga muvofiq hozirda sayyohlik maskani sifatida faoliyat yuritayotgan sobiq federal qamoqxona mamlakatdagi eng zamonaviy jazoni o‘tash muassasalardan biriga aylantiriladi. Mutaxassislar ta’mirlash ishlarining umumiy qiymatini 2 milliard dollargacha baholamoqda.

 

Ma’lumotlarga ko‘ra, Donald Tramp 2025-yil may oyida “Alkatras”ni yana ishga tushirish bo‘yicha farmon bergan. Mazkur muassasada og‘ir jinoyatlar sodir etgan shaxslar saqlanishi rejalashtirilgan. Prezident bu tashabbusni “qonun va tartib ramzi” sifatida izohlagan.

 

“Alkatraz” qamoqxonasi 1934–1963-yillarda faoliyat yuritgan bo‘lib, AQShdagi eng mashhur va qat’iy tartibli qamoqxonalardan biri sifatida tanilgan. U San-Fransisko ko‘rfazidagi orolda joylashgan bo‘lib, qochib ketish deyarli imkonsiz hisoblangan. Bu yerda, jumladan, mashhur gangster Al Kapone ham jazo o‘tagan. 1972-yildan buyon esa mazkur obyekt muzey sifatida faoliyat yuritib kelmoqda.

 

Qamoqxonaning yopilishiga asosiy sabab sifatida uni saqlash xarajatlarining yuqoriligi ko‘rsatiladi. Xususan, oziq-ovqat mahsulotlarini orolga suv orqali yetkazish zarur bo‘lgan. Bundan tashqari, dengiz iqlimi binolarning tez eskirishiga olib kelgan.