Dog‘istonda kuchli yomg‘ir sabab uch qavatli bino qulab tushdi
Suv toshqinlari Maxachkala va Derbent shaharlarida jiddiy talafotlarga sabab bo‘lib, aholini evakuatsiya qilish ishlari olib borilmoqda.
Dog‘istonda 5-aprel kechasi kuzatilgan kuchli yog‘ingarchilik bir qator hududlarda suv toshqinlariga sabab bo‘ldi. Eng og‘ir vaziyat Maxachkala va Derbent shaharlarida qayd etilgan.
Mahalliy rasmiylar ma’lumotiga ko‘ra, kuchli jala natijasida ayrim ko‘chalar va turar-joy hududlari suv ostida qolgan. Maxachkaladagi Aivazovskiy ko‘chasida joylashgan olti qavatli ko‘p qavatli uy jala suvlari oqibatida zararlangani sababli binodagi aholi evakuatsiya qilinmoqda. Favqulodda vaziyat joyiga qutqaruv ekipajlari va avtobuslar yuborilgan.
Ijtimoiy tarmoqlarda suv toshqini tufayli evakuatsiya qilinayotgan bino yaqinidagi uch qavatli binoning qulab tushgani aks etgan foto va videolar tarqaldi. Hozircha jabrlanganlar haqida ma’lumot berilmagan.
Kuchli yomg‘ir oqibatida respublikaning 139 ta aholi punktida elektr ta’minotida uzilishlar yuzaga kelgan. Favqulodda vaziyatlar xizmatlari ma’lumotiga ko‘ra, bunga elektr uzatish liniyalaridagi qisqa tutashuvlar sabab bo‘lgan.
Shuningdek, Derbent va Maxachkala shaharlari ko‘chalarida transport harakati qiyinlashgan, ayrim yo‘llar vaqtincha yopilgan. Derbentda suv bosgan hovlilardan birida qutqaruvchilar bir ayol va bolani evakuatsiya qilib, ularni vaqtinchalik boshpanaga joylashtirgan.
Derbent–Maxachkala avtomagistralining ayrim qismlari ham suv ostida qolgan. Qutqaruvchilar odamlarni xavfli hududlardan o‘t o‘chirish mashinalari va boshqa maxsus texnikalar yordamida olib chiqmoqda.
Ayni paytda Dog‘istonning favqulodda xizmatlari kuchaytirilgan rejimda ishlamoqda va suv toshqinlari oqibatlarini bartaraf etish choralari ko‘rilmoqda.
