Eron havo hududi 12-aprelgacha yopiq qolishini rejalashtirmoqda
Faqat davlat, harbiy va tibbiy reyslarga istisno berilishi mumkin.
Eron rasmiylari mamlakat havo hududi kamida 12-aprelga qadar yopiq holda qolishini rejalashtirmoqda. Bu haqda TASS agentligi xabar berdi.
Ma’lum qilinishicha, cheklovlar asosan fuqarolik aviatsiyasi parvozlariga taalluqli bo‘ladi. Shu bilan birga, ayrim istisnolar ham ko‘zda tutilgan. Xususan, davlat, harbiy va tibbiy aviatsiya reyslari, shuningdek, maxsus ruxsatnoma olgan ayrim parvozlarga ruxsat berilishi mumkin.
Mintaqada keskinlik 28-fevraldan buyon ortib bormoqda. Isroil, AQSh va Eron o‘rtasidagi qarama-qarshilik kuchaygani fonida Eron bir necha bor Yaqin Sharqdagi ayrim davlatlar hududlariga zarbalar bergani haqida xabarlar berilgan edi. Eron rasmiylari esa ushbu hujumlar AQSh harbiy bazalariga qaratilganini bildirgan.
Shuningdek, Eron Turkiya hududiga hujum qilinganini rad etgan. Yaqin Sharqdagi qator davlatlar Tehronning harakatlarini tanqid qilgan. Jumladan, BAA mamlakatdagi elchixonasini yopib, elchisini chaqirib oldi, Saudiya Arabistoni esa javob choralarini ko‘rishi mumkinligini bildirdi.
Bundan tashqari, Eron tomonidan Hormuz bo‘g‘ozi amalda yopilgani haqidagi xabarlar fonida jahon energiya bozorida narxlar keskin oshgani qayd etilmoqda. Eron Oliy rahbari davlat televideniyesi orqali e’lon qilingan bayonotida ushbu blokadadan ta’sir vositasi sifatida foydalanish zarurligini ta’kidlagan.
