Eron Yaqin Sharqda AQSh va Isroilning neft-gaz infratuzilmalariga zarba berdi

Eron Islom inqilobi qo‘riqchilari korpusi (IRGC) Fors ko‘rfazi mintaqasidagi bir qator mamlakatlarda joylashgan AQSh va Isroil bilan bog‘liq obyektlarga zarbalar berilganini e’lon qildi. Bu haqda Eronning Fars axborot agentligi xabar berdi.

 

IRGC ma’lumotlariga ko‘ra, hujumlar jami beshta nishonga qaratilgan. Xususan, Isroil havo kuchlari qiruvchi samolyotlarini yoqilg‘i bilan ta’minlaydigan Hayfa shahridagi neftni qayta ishlash zavodi kuchli zarbaga uchragani aytilmoqda. Natijada obyektning asosiy qismlari jiddiy zarar ko‘rgani ta’kidlangan.

 

Shuningdek, BAAning Xabshan hududida joylashgan va Amerikaning ExxonMobil hamda Chevron kompaniyalariga tegishli gaz inshootlari ham hujum nishoniga aylangan. Bundan tashqari, Ar-Ruvays shahridagi AQSh neft-kimyo zavodiga ham raketa zarbalari berilgani ma’lum qilindi. Mazkur obyekt AQSh harbiylari uchun yoqilg‘i hamda Isroil uchun harbiy mahsulotlar ishlab chiqaradi.

 

Bundan tashqari, Bahraynda joylashgan va AQSh harbiylarini neft mahsulotlari bilan ta’minlaydigan neft-kimyo zavodiga dron hujumi uyushtirilgani bildirildi. Hujum oqibatida kuchli yong‘in yuzaga kelib, obyektning asosiy qismlari vayron bo‘lgani qayd etilgan.

 

Ma’lumotlarga ko‘ra, Quvaytning Shuayba hududida joylashgan Amerika obyektlari ham zarar ko‘rgan. Ushbu majmuada yuzaga kelgan yong‘in AQSh harbiylari bilan hamkorlik qiladigan ishlab chiqarish faoliyatining to‘xtashiga sabab bo‘lgan.

 

Bundan tashqari, Bahrayndagi BAPCO Energies neftni qayta ishlash zavodida ham dron hujumi oqibatida yong‘in kelib chiqqani xabar qilinmoqda.

 

Eron 28-fevraldan buyon AQSh va Isroilning hujumlariga javoban Yaqin Sharqdagi Amerika harbiy bazalari hamda neft-gaz infratuzilmalariga qarshi zarbalar berayotganini bildirgan.