Jizzaxda Nexia va Cobalt to‘qnashuvi oqibatida 5 kishi halok bo‘ldi
YTH qurbonlari orasida 54 yoshli Xitoy fuqarosi ham bo‘lgani aytilmoqda.
Jizzax viloyati Forish tumanida sodir bo‘lgan yo‘l-transport hodisasi oqibatida 5 kishi halok bo‘ldi. Bu haqda Kun.uz nashri xabar berdi.
Ma’lumotlarga ko‘ra, hodisa 4-aprel kuni soat 16:05 atrofida Jizzax–Bog‘don–Qizilcha avtomobil yo‘lida yuz bergan.
Navoiy viloyati Xatirchi tumanida yashovchi 27 yoshli haydovchi boshqaruvidagi Nexia avtomobili quvib o‘tish qoidasini buzgan.
Oqibatda avtomobil qarama-qarshi yo‘nalishda harakatlanib kelayotgan, Forish tumanida yashovchi 35 yoshli haydovchi boshqaruvidagi Cobalt bilan to‘qnashgan.
Yo‘l-transport hodisasi natijasida har ikki avtomobil haydovchisi, shuningdek Nexia avtomobilida yo‘lovchi sifatida ketayotgan 54 yoshli Xitoy fuqarosi voqea joyida halok bo‘lgan.
Shuningdek, Cobalt avtomobilidagi ikki nafar yo‘lovchi og‘ir tan jarohatlari bilan shifoxonaga olib borilgan, biroq ko‘rsatilgan tibbiy yordamga qaramay ular ham vafot etgan.
Hodisa yuzasidan hozircha rasmiy idoralar tomonidan qo‘shimcha ma’lumot berilmagan.
