Quvaytda Eron tomonidan vazirlik binosiga dron hujumi uyushtirildi
Hujum natijasida Moliya vazirligi binosiga moddiy zarar yetgan, shuningdek, mamlakatdagi ikkita elektr va suv ta’minoti stansiyasi shikastlangan
Quvayt poytaxtida joylashgan Moliya vazirligi binosi uchuvchisiz uchish apparati hujumi oqibatida zarar ko‘rdi. Bu haqda vazirlik matbuot xizmati ijtimoiy tarmoqlarda ma’lum qildi.
Rasmiy bayonotga ko‘ra, hodisa 4-aprel kuni kechqurun sodir bo‘lgan. Unda Eron tomonidan amalga oshirilgan dron hujumi natijasida Quvayt shahridagi vazirlik majmuasi binosi shikastlangani aytilgan.
Hujum oqibatida binoga moddiy zarar yetgan, biroq jabrlanganlar haqida ma’lumot yo‘q. Vazirlik xodimlari 5-aprel kuni masofadan turib ishlashi, fuqarolar qabuli esa vaqtincha to‘xtatilganini bildirgan.
Idora faoliyati odatdagi tartibda 6-aprel kunidan qayta tiklanadi.
Mahalliy KUNA axborot agentligi xabariga ko‘ra, Eron tomonidan amalga oshirilgan hujumlar natijasida mamlakatdagi ikkita elektr va suv ta’minoti stansiyasi ham shikastlangan. Natijada ayrim energetika obyektlari vaqtincha faoliyatini to‘xtatgan.
Quvayt Elektr, suv va qayta tiklanadigan energiya vazirligi ma’lumotiga ko‘ra, 3-aprel kuni ham Eron Quvaytning energetika infratuzilmasiga qarashli elektr stansiyasi hamda suvni tuzsizlantirish zavodiga zarba bergan. Ushbu hujumlar oqibatida obyektlarga moddiy zarar yetgani qayd etilgan.
