Samarqandda bedarak yo‘qolgan ayolning jasadi3 oydan beri topilmayapti
Taxminlarga ko‘ra, u tanish yigit tomonidan o‘ldirilib, jasadi Darg‘om kanaliga tashlangan bo‘lishi mumkin.
Samarqandda bedarak yo‘qolgan 38 yoshli ayolning o‘limi bilan bog‘liq holat yuzasidan yangi tafsilotlar ma’lum bo‘ldi.
"Millar"ning ma'lum qilishicha, ayol 2025-yil 24-dekabr kuni uyidan chiqib ketganidan so‘ng bedarak yo‘qolgan. Yaqinlarining aytishicha, u o‘sha kuni ishdan qaytib, uyida bo‘lgan, keyinchalik qarz masalasini hal qilish bahonasida tanish yigit bilan uchrashgani chiqib ketgan va shundan so‘ng qaytib kelmagan. Oradan ko‘p o‘tmay uning telefoni ham o‘chgan.
Qarindoshlarning bildirishicha, gumonlanuvchi avval ham marhumadan avtomobil ijaraga olib, to‘lovni bermasdan qochib yurgan. Taxminlarga ko‘ra, ular o‘rtasida yuzaga kelgan janjal oqibatida ayolga pichoq bilan zarba berilgan, so‘ngra bo‘g‘ib o‘ldirilgan bo‘lishi mumkin.
Shuningdek, gumonlanuvchi ayolning jasadini Spark avtomobilida olib kelib, Darg‘om kanali hududiga tashlagani taxmin qilinmoqda. Marhumaning yaqinlari jasad Ravotxo‘ja hududi yaqinida suvga tashlangan bo‘lishi mumkinligini bildirgan.
Biroq hodisadan buyon uch oydan ortiq vaqt o‘tganiga qaramay, jasad hozirgacha topilmagan. Dastlab qidiruv ishlari 27-yanvargacha davom etgan, keyinchalik esa to‘xtatilgan. 2026-yil 25-mart kuni suv vaqtincha to‘xtatilib, yana qidiruv o‘tkazilgan, ammo bu ham natija bermagan.
Samarqand viloyati prokuraturasi ma’lumotiga ko‘ra, mazkur holat yuzasidan Jinoyat kodeksining 97-moddasi 1-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.
