Tramp 48 soatdan keyin Eronga “doʻzax yogʻilishi“ni aytdi
Eron kelishuvga erishishi yoki Hormuz bo‘g‘ozi masalasini hal qilishi uchun berilgan muddat yakunlanmoqda.
Donald Tramp Eron bilan muzokaralar masalasida keskin bayonot berib, agar Tehron yaqin 48 soat ichida kelishuvga erishmasa yoki Hormuz bo‘g‘ozi bilan bog‘liq masalada murosaga kelmasa, jiddiy choralar ko‘rilishi mumkinligini ma’lum qildi.
AQSh prezidenti bu haqda o‘zining Truth Social ijtimoiy tarmog‘idagi sahifasida yozgan. Uning ta’kidlashicha, avvalroq Eron tomoniga kelishuvga erishish yoki Hormuz bo‘g‘ozi masalasini hal qilish uchun 10 kunlik muddat berilgan edi.
“Eron kelishuvga erishishi yoki Hormuz bo‘g‘ozini ochishi uchun o‘n kun berilganini eslang. Vaqt tugayapti – barcha do‘zax ochilishiga 48 soat qoldi”, — deb yozgan AQSh rahbari.
Avvalroq AQSh Eronning energetika infratuzilmasiga ehtimoliy zarbalarni vaqtincha to‘xtatib turishini ma’lum qilgan edi. 23-mart kuni Vashington Tehron bilan muzokaralar davom etayotganini bildirib, harbiy bosimni bir necha kunlik muddatga to‘xtatganini e’lon qilgan.
26-mart kuni esa Tramp bu muddatni 6-aprelgacha uzaytirganini aytib, muzokaralar davom etayotganini va ular “ijobiy ruhda” o‘tayotganini ta’kidlagan. Shu bilan birga, AQSh rahbari ayrim OAVlarda tarqalgan salbiy xabarlarni “soxta ma’lumotlar” deb atagan.
Ma’lumotlarga ko‘ra, Tehron avval AQSh tomonidan taklif qilingan bir qator shartlarni rad etgan hamda ayrim masalalarda qo‘shimcha talablar qo‘ygan.
