Turkiyadagi o‘zbekistonliklar ogohlantirildi
Fuqarolarga ommaviy yig‘inlardan chetda bo‘lish, firibgarlardan ehtiyot bo‘lish va shubhali vaziyatlarda huquq-tartibot organlariga murojaat qilish tavsiya etildi.
O‘zbekistonning Istanbul shahridagi Bosh konsulxonasi Turkiyada bo‘lib turgan o‘zbekistonlik fuqarolarni hushyorlikni oshirish va xavfsizlik qoidalariga qat’iy rioya etishga chaqirdi.
Diplomatik vakolatxona ma’lumotiga ko‘ra, fuqarolardan kundalik hayotda o‘zlarining sog‘lig‘i va hayotiga zarar yetkazishi mumkin bo‘lgan shubhali vaziyatlardan uzoqda bo‘lish, ommaviy yig‘inlar va namoyishlarda qatnashmaslik, shuningdek, odamlar gavjum joylarda ehtiyotkorlikni kuchaytirish so‘ralgan.
Shuningdek, qonuniy huquq va manfaatlari buzilgan yoki og‘ir hamda favqulodda holatga duch kelgan fuqarolar zudlik bilan mahalliy huquq-tartibot organlariga murojaat qilishlari kerakligi ta’kidlangan. Buning uchun Turkiyada 155 (politsiya) yoki 156 (jandarmeriya) qisqa raqamlari orqali bog‘lanish, shuningdek, Bosh konsulxonaning 24/7 ishlaydigan ishonch telefoniga murojaat qilish mumkin.
Konsulxona fuqarolarga yana bir muhim huquqni ham eslatib o‘tdi. Agar o‘zbekistonlik fuqaro yoki uning yaqinlari mahalliy huquq-tartibot organlari tomonidan qo‘lga olingan, ozodligi cheklangan yoki ayb e’lon qilingan bo‘lsa, ular advokat himoyasini talab qilish, yaqinlariga telefon orqali xabar berish hamda Bosh konsulxona bilan bog‘lanish huquqiga ega.
Diplomatik vakolatxona shuningdek, pul evaziga Turkiyada yashash hujjatlarini rasmiylashtirib berishni, daromadli ish topib berishni yoki AQSH hamda Yevropa davlatlari vizalarini va’da qilayotgan firibgarlardan ehtiyot bo‘lishga chaqirdi.
Bundan tashqari, ayniqsa ayollar va yolg‘iz fuqarolarga rasmiy ruxsatnomasi bo‘lmagan taksi xizmatlaridan foydalanmaslik tavsiya etildi.
“Hurmatli vatandoshlar! Sizning huquq va manfaatlaringiz davlat himoyasidadir”, — deyiladi Bosh konsulxona murojaatida.
