Umraga borgan 170 dan ortiq o‘zbekistonlik Vatanga qayta olmayapti

Bosh konsulxona ma’lumotlariga ko‘ra, umra ziyorati uchun kelgan 170 dan ortiq O‘zbekiston fuqarosi hozirga qadar Vatanga qayta olmagan. Bu haqda “Dunyo” axborot agentligi xabar berdi.

 

Diplomatlar “Kanari” va “Al-Ayam Elite” mehmonxonalariga tashrif buyurib, ziyoratchilarning holatini joyida o‘rganishdi. Suhbat davomida, ko‘pchilik keksa yoshdagi, infarkt, qandli diabet, qon bosimi kabi surunkali kasalliklarga chalingan shaxslar ekanligi, shuningdek, ular doimiy dori-darmon qabul qilishini ma’lum qildi.

 

Ma’lum bo‘lishicha, ziyoratchilar 14 kunlik umra safari doirasida turli guruhlar tarkibida Saudiya Arabistoniga kelgan, biroq safarni tashkil etgan shaxslar tomonidan berilgan noto‘g‘ri ma’lumotlar va xatolar tufayli Vatanga qayta olmayapti.

 

Bosh konsulxona vakillari shuningdek, so‘nggi yillarda ruxsatnomasiz turistik firmalar va jismoniy shaxslar tomonidan tartibsiz umra safarlari tashkil etilishi ko‘plab fuqarolarni qiyin ahvolga solayotganini ta’kidladi.

 

Shu bilan birga, rasmiy litsenziyaga ega 14 ta firma orqali umra safarlari rasmiy tarzda tashkil etilayotgani va bu haqda muntazam axborot berib borilayotgani aytildi.

 

Ziyoratchilarga Vatanga qaytish bo‘yicha murojaatlari Bosh konsulxona tomonidan tegishli idoralarga yetkazilgani va ko‘rib chiqilishi ma’lum qilindi. Shu bilan birga, vaziyat og‘irlashmasligi uchun imkoniyatdan kelib chiqqan holda aviachipta xarid qilish va O‘zbekistonga qaytishni tavsiya qilindi.

 

Hozirgi kunda mazkur holat Bosh konsulxona tomonidan doimiy nazorat ostida bo‘lib, vaziyatni hal etish uchun chora-tadbirlar amalga oshirilmoqda.