Andijon viloyati hokimi o‘rinbosari 50 ming dollar pora bilan ushlandi
U davlat zaxirasidagi yer maydonini fuqaroga rasmiylashtirib bermoqchi bo‘lgan.
Andijon viloyati hokimining turizm, madaniyat, madaniy meros va ommaviy kommunikatsiyalar bo‘yicha o‘rinbosari Ismanov Isomiddin Baxriddinovich pora olayotganda ushlandi.
Ma’lum qilinishicha, Davlat xavfsizlik xizmati viloyat boshqarmasi xodimlari tomonidan 2026-yil 4-aprel kuni fuqaro S.R.T.ning murojaati asosida tezkor tadbir o‘tkazilgan. Tadbir davomida mansabdor shaxs 50 ming dollar miqdoridagi pulni olayotgan paytda ashyoviy dalillar bilan ushlangan.
Xabarga ko‘ra, Ismanov fuqaro S.R.T.ga tadbirkorlik faoliyatini boshlash uchun Bobur shahri hududidagi davlat zaxirasida bo‘lgan 20 sotix yer maydonini viloyat qurilish va uy-joy kommunal xo‘jaligi bosh boshqarmasi boshlig‘i orqali auksionga qo‘ydirib, uning nomiga rasmiylashtirib va kelgusida ushbu joyda qurilish uchun ruxsatnoma olib berishini aytgan. Ushbu xizmat evaziga u har bir sotix yer uchun 2 500 dollardan jami 50 ming dollar talab qilgan.
Tezkor tadbirda S.R.T. tomonidan kimyoviy ishlov berilgan pul mablag‘lari Ismanovga uning yashash xonadonida topshirilgan paytda mansabdor qo‘lga olingan.
Mazkur holat yuzasidan I.B.Ismanovga nisbatan Jinoyat kodeksining 25, 168-moddasi 4-qismi “a” bandi va 28, 211-moddasi 3-qismi “a” bandi bilan jinoyat ishi qo‘zg‘atilgan. B.Ismanov Jinoyat-protsessual kodeksining 221-moddasi tartibida ushlangan.
Ma’lumot uchun, Isomiddin Ismanov 2022-2025-yillarda Andijon viloyati IIB boshlig‘ining o‘rinbosari – Jamoat xavfsizligi xizmati boshlig‘i, 2025-yil may oyidan IIV Tezkor-qidiruv departamenti, tezkor vaziyatni tahlil qilish boshqarmasi boshlig‘i lavozimida ishlagan.
2025-yil dekabr oyida Andijon viloyati hokimining turizm, madaniyat, madaniy meros va ommaviy kommunikatsiyalar masalalari bo‘yicha o‘rinbosari lavozimiga tayinlangan.
