AQSH Eronga qarshi urushda nechta samolyot yo‘qotgani ma’lum qilindi

AQSHning Eronga qarshi bir oydan ortiq davom etayotgan harbiy operatsiyasi davomida kamida 7 ta samolyot yo‘q qilingan. Bu haqda CNN xabar berdi.

 

Ma’lumotlarga ko‘ra, AQSHning dastlabki yo‘qotishlari 2-mart kuni sodir bo‘lgan. O‘shanda uchta F-15 qiruvchi samolyoti Kuvayt hududi ustida anglashilmovchilik tufayli Kuvayt havo hujumidan mudofaa vositalari tomonidan urib tushirilgan.

 

Hodisada olti nafar ekipaj a’zosi katapult qilib qutulib qolgan. Pentagon rahbari Pit Hegsetning uchuvchilar keyinchalik yana Eronga qarshi havo hujumlarida ishtirok etish uchun xizmatga qaytganini bildirgan.

 

Oradan bir yarim hafta o‘tib, 12-mart kuni KC-135 yonilg‘i quyish samolyoti halokatga uchradi. Hodisa oqibatida olti nafar ekipaj a’zosi halok bo‘lgan.

 

AQSH harbiylariga ko‘ra, mazkur samolyot dushman hujumi natijasida emas, balki harbiy operatsiya davomida boshqa samolyot bilan to‘qnashuv sabab qulagan. Ikkinchi samolyot esa xavfsiz qo‘ngan.

 

27-mart kuni oy oxirida AQSH HHKning E-3 Sentry havodan ogohlantirish va boshqaruv samolyoti Saudiya Arabistonidagi shahzoda Sulton aviabazasida uchish-qo‘nish yo‘lagida Eron hujumi natijasida yo‘q qilingan.

 

CNN xabarida mazkur aviabazaga qilingan hujum natijasida kamida 10 nafar amerikalik harbiy jarohat olgani keltirilgan. Hodisada yana bir yonilg‘i quyish samolyoti ham shikastlangan.

 

Bundan tashqari, o‘tgan oyda AQSHning F-35 qiruvchi samolyoti Yaqin Sharqdagi aviabazalardan birida taxminlarga ko‘ra, Eron qo‘shinlari tomonidan o‘qqa tutilganidan so‘ng favqulodda qo‘nishni amalga oshirgan.

 

So‘nggi yo‘qotilgan ikki samolyot F-15 va A-10 Warthong hisoblanadi. Ulardan biri urib tushirilgan, ikkinchisi esa shikastlangan holda Kuvaytgacha yetib borgan.

 

Mazkur hodisada ikki nafar uchuvchi qutqarilgan, bir nafar uchuvchi esa bedarak yo‘qolgan.

 

AQSH havo kuchlari polkovnigi bo‘lgan bedarak yo‘qolgan ofitser katapulta paytida jarohat olgan va yordam kelguncha tog‘ bag‘rida yashiringan. Shu yerdan turib o‘zining joylashuvini AQSH bazasiga uzatgan. Ofitser qutqarilgach, tez tibbiy yordam ko‘rsatilgan.