“Beshqo‘rg‘on”dagi yong‘inda jarohatlanganlar va qurbonlar bormi?
FVV tarqalayotgan xabarlarga oydinlik kiritdi.
Toshkent shahrida joylashgan “Beshqo‘rg‘on” savdo majmuasida yong‘in sodir bo‘lgan yong‘inda jabrlanganlar borligi haqida xabarlar tarqalgandi. FVV mazkur holat yuzasidan ma’lumot berdi.
FVV ma’lum qilishicha, yong‘in oqibatida fuqarolar orasida jabrlanganlar yo‘q. Ayni paytda yong‘in sabablari hamda yetkazilgan moddiy zarar miqdori aniqlanmoqda.
Shuningdek, vazirlik ijtimoiy tarmoqlarda tarqalgan “jabrlanganlar bor” mazmunidagi xabarlarni asossiz deb baholab, ommaviy axborot vositalari va blogerlarni axborot tarqatishda ehtiyotkor bo‘lishga chaqirdi.
Toshkent shahrida joylashgan “Beshqo‘rg‘on” savdo majmuasida 5-aprel kuni yong‘in sodir bo‘lgan edi. Yong‘in haqida soat 15:56 da xabar kelib tushgan.
Shundan so‘ng qutqaruv va yong‘in o‘chirish bo‘linmalari zudlik bilan voqea joyiga yetib borib, yong‘inni bartaraf etish ishlarini boshlagan.
Vazirlik ma’lumotiga ko‘ra, yong‘in qisqa vaqt ichida nazoratga olinib, uning keng hududga tarqalishining oldi olingan. Soat 18:18 da yong‘in to‘liq o‘chirilgan.
