“Daydi topib, rasmiylashtiring” — Olmazor tumani IIB amaldori

Toshkent shahri Olmazor tumani Ichki ishlar bo‘limi amaldori Abror Xudoyberdiyev profilaktika inspektorlariga ko‘chadan “daydi” topib, ma’muriy bayonnoma rasmiylashtirish bo‘yicha topshiriq bergan. Bu haqda Kun.uz xabar berdi.

 

Nashrga kelib tushgan audio va videolavhalarda amaldor xodimlarga daydi topilmasa, o‘zlari yoki qarindoshlari “daydi” sifatida rasmiylashtirilishi kerakligini aytgan. 

 

“E, profilaktika inspektorlari, men sizlarga yana qayta aytyapman, daydi nol bo‘lib turibdi! Vijdonsiz, daydi yo‘qmi Olmazor tumanida? Daydi qil hozir! Hamma narsada nol bo‘lib yotibdi protokollar: majburiy davolashga joylashtirishing nol, daydi nol, ma’muriy bayonnomang nol, ma’muriy nazorat nol! Nima, o‘zlaringdan ketib qolganmisanlar, vijdonsiz! Qani bittang daydi qilma-chi. O‘zingni daydi qilib olib borib yop, qarindoshingni olib borib yop daydi qilib! O‘zing daydi bo‘lasan!” — degan amaldor.

 

Shuningdek, videolavhada amaldor belgilangan rejani bajarish uchun qisqa vaqt qolganini aytib, barcha xodimlarga ko‘chalarga chiqish hamda belgilangan miqdorda ma’muriy bayonnomalar tuzish bo‘yicha topshiriq bergan.

 

“1 soat vaqtimiz qoldi. 22:00 da hisob-kitob bo‘ladi. Men borishni xohlamayman. “Davay”, hozir “gazlaymiz”, 300 taga chiqdi, 200 ta protokolimiz qoldi, chiq hammang ko‘chaga!” — degan Abror Xudoyberdiyev o‘z topshirig‘ida.

 

Ichki ishlar vazirligi matbuot xizmati mazkur holat yuzasidan nashr so‘roviga javoban voqea o‘rganilayotganini bildirgan.