Eron razvedkasi rahbari halok bo‘ldi
Isroil Majid Xademiyni tinch aholiga qarshi zarbalarga aloqadorlikda aybladi.
Eron Islom inqilobi qo‘riqchilari korpusi (IIQK) razvedka bo‘linmasi rahbari, general-mayor Majid Xademiy halok bo‘lganini tasdiqladi. Bu haqda IIQK matbuot xizmati xabar berdi.
Ma’lum qilinishicha, Eron 6-aprel kuni IIQK razvedka bo‘linmasi rahbari Majid Xademiyning halok bo‘lganini rasman tasdiqladi. Korpus ma’lumotiga ko‘ra, u erta tongda o‘ldirilgan. Biroq uning o‘limi bilan bog‘liq boshqa tafsilotlar keltirilmagan.
Ta’kidlanishicha, Xademiy 2025-yil iyun oyi o‘rtalarida, Isrolining Tehrondagi razvedka binosiga bergan zarbasi oqibatida o‘zidan oldin mazkur lavozimda bo‘lgan Muhammad Kozimiyning vafotidan so‘ng, IIQK razvedkasi rahbari etib tayinlangan.
Shuningdek, Isroil mudofaa vaziri Israel Kats Bosh shtab rahbaridan Xadeymining Isroil armiyasi tomonidan o‘ldirilgani haqida ma’lumot olganini ma’lum qildi. Katsning so‘zlariga ko‘ra, general Isroil tinch aholisiga qarshi amalga oshirilgan halokatli raketa zarbalari uchun bevosita javobgar bo‘lgan.
“IIQK inch aholiga qarata o‘q uzmoqda, biz esa terrorchilar yetakchilarini yo‘q qilmoqdamiz”, — dedi Kats.
“Eron rahbariyati o‘zini nishonda turgandek his qilmoqda. Biz ularni birma-bir yo‘q qilib, ovlashni davom ettiramiz”, — deya va’da berdi Isroil mudofaa vaziri.
Kats Isroil Eronning po‘lat ishlab chiqarish va neft-kimyo sanoatiga ham “jiddiy zarar” yetkazganini, shuningdek, Eron milliy infratuzilmasini vayron qilish va rejimning qudratini susaytirish bo‘yicha harakatlarni davom ettirishini ta’kidladi.
Bundan tashqari Isroil rasmiysi Eron rahbariyatini bevosita nishonga olishga va ularni birma-bir yo‘q qilishga va’da berdi.
