Hindiston chegarani qo‘riqlashda ilon va timsohlardan foydalanishi mumkin

 

Hindiston Bangladesh bilan chegaraning borish qiyin bo‘lgan hududlarida xavfsizlikni kuchaytirish maqsadida ilonlar va timsohlardan foydalanish imkoniyatini o‘rganmoqda. Bu haqda The Hindu nashri Hindiston Chegara Xavfsizligi Kuchlari (BSF) hujjatlariga tayanib xabar berdi.

 

Ma’lum qilinishicha, Hindistonning Pokiston va Bangladesh bilan chegaralarini qo‘riqlovchi Chegara Xavfsizligi Kuchlari o‘z bo‘linmalariga chegara daryolari hududlarida sudralib yuruvchilardan foydalanish imkoniyatini tahlil qilish bo‘yicha topshiriq bergan.

 

Hujjatda ta’kidlanishicha, daryolar bo‘yidagi zaif hududlarda ilonlar yoki timsohlar kabi sudralib yuruvchilardan foydalanish operatsion nuqtai nazardan qanchalik maqsadga muvofiqligi o‘rganilishi kerak.

 

Ushbu tashabbus Hindiston va Bangladesh o‘rtasidagi chegara hududlarining daryo, botqoqlik va murakkab relyefga ega qismlariga taalluqlidir. Bunday joylarda an’anaviy to‘siqlar o‘rnatish qiyin bo‘lgani sababli sudralib yuruvchilardan tabiiy to‘siq sifatida foydalanish varianti ko‘rib chiqilmoqda.

 

Shu bilan birga, mazkur tashabbus mahalliy aholi uchun xavf tug‘dirishi mumkinligi sababli hozircha faqat o‘rganish bosqichida ekani qayd etildi.

 

Hindiston Ichki ishlar vazirligi ma’lumotlariga ko‘ra, Hindiston va Bangladesh o‘rtasidagi davlat chegarasi uzunligi 4900 kilometrdan ortiqni tashkil etadi. Avvalroq hukumat noqonuniy migratsiya hamda noqonuniy faoliyatlarning oldini olish maqsadida chegara bo‘ylab maxsus to‘siqlarni bosqichma-bosqich qurishni boshlagan. Biroq murakkab ekologik sharoitlar sabab ayrim hududlarda bu ishlar hali yakunlanmagan.