Madaniyat vazirligi san’atkorlar soliqqa tortilishida yengilliklar kiritishni taklif qildi

 

Madaniyat vazirligi 2026-yil 1-sentabrdan san’atkorlar va konsert-tomosha sohasidagi ijrochilar xizmatlarini “Soliq” mobil ilovasi orqali majburiy ro‘yxatdan o‘tkazish bo‘yicha Adliya vazirligi tomonidan ishlab chiqilgan qaror loyihasiga munosabat bildirdi.

 

Loyiha matnida to‘y, yubiley, sunnat to‘yi, nikoh marosimlari hamda restoran va boshqa tadbirlarda ko‘rsatiladigan har bir xizmat “bir xizmat — bir to‘lov” tamoyili asosida soliqqa tortilishi nazarda tutilgan. Bu esa har bir chiqish alohida hisobga olinib, soliq undirilishini talab qiladi.

 

Madaniyat vazirligi ta’kidlashicha, hozirgi kunda konsert-tomosha sohasi vakillari amaldagi qonunchilik asosida soliq to‘lab kelmoqda. Ular har oy kamida bir baravar bazaviy hisoblash miqdorida (hozirda 412 ming so‘m) ijtimoiy soliq to‘laydi va yillik daromadidan 12 foiz daromad solig‘i undiriladi. Shuningdek, davlat tadbirlariga jalb etiladigan ijodkorlar va ijrochilarning xizmat haqlari qonuniy tartibda to‘lanadi.

 

Vazirlik loyiha yuzasidan soliq stavkalarini toifalar kesimida adolatli belgilash, san’atkorlar va ijrochilar uchun tabaqalashtirilgan yondashuvni joriy etish, hujjat normalarini aniqlashtirish va amaliy qo‘llashni soddalashtirish, davlat tadbirlariga jalb etiladigan ijodkorlarning huquqlarini himoya qilish kabi takliflarni bildirdi.

 

Vazirlik shuningdek jamoatchilik fikri muhimligini ta’kidlab, yakuniy qaror qonuniylik, adolat va amaliy samaradorlik tamoyillari asosida qabul qilinishi lozimligini ma’lum qildi.