Ozarbayjon suvereniteti muhokama qilinmaydi — Ozarbayjon TIV
Putin va Pashinyan Qorabog‘ Ozarbayjonga tegishli ekanini so‘roq ostiga oldi.
5-aprel kuni Ozarbayjon tomoni Rossiyada so‘nggi kunlarda Qorabog‘ mintaqasi haqida bildirilgan fikrlarga rasmiy munosabat bildirdi.
Ozarbayjon TIVning bayonotida qayd etilishicha, 1-aprel kuni Moskvada Rossiya Federatsiyasi Prezidenti Vladimir Putin va Armaniston Bosh vaziri Nikol Pashinyan o‘rtasida bo‘lib o‘tgan uchrashuv davomida va undan keyin Rossiya rasmiylari tomonidan jamoatchilik muhokamalarida Ozarbayjonning ichki ishlariga taalluqli masalalarga to‘xtalib o‘tilgan.
Ozarbayjon tomoni Qorabog‘ mintaqasidan siyosiy spekulyatsiyalar uchun foydalanish mutlaqo qabul qilib bo‘lmasligini bildirib, bu kabi holatlarga barham berilishi kutilayotganini diplomatik kanallar orqali Rossiya Prezidenti Administratsiyasi, hukumati va Tashqi ishlar vazirligiga yetkazganini ma’lum qildi.
“Shunga qaramay, bu mavzu Rossiya tomonining rasmiy siyosiy munozarasida muhokama qilinmoqda. Shunday qilib, bugun Rossiya prezidentining matbuot kotibi Dmitriy Peskov “Vesti” kanaliga bergan intervyusida Armaniston-Rossiya munosabatlari bo‘yicha o‘z pozitsiyasini bildirar ekan, yana bir bor Qorabog‘ mintaqasi avval Rossiya yoki Armaniston tomonidan Ozarbayjonning bir qismi sifatida tan olinganmi degan savolga izoh berdi”, deyiladi bayonotda.
Ozarbayjon TIV Qorabog‘ mamlakatning ajralmas qismi ekanini tarix, xalqaro huquq va adolat tasdiqlashini qayd etgan. Shuningdek, bu holat 2020-yildagi 44 kunlik urush va 2023-yildagi antiterror tadbirlari natijasida yana bir bor mustahkamlanganini bildirilgan.
Bayonotda hech bir davlat, Rossiya ham, hech qachon Ozarbayjonning hududiy yaxlitligini shubha ostiga qo‘ymagani eslatilgan.
Ozarbayjon tomoni mamlakat suverenitetiga oid masalalar Rossiya va Armaniston o‘rtasidagi murakkab munosabatlar fonida omma oldida muhokama qilinmasligi kerakligini ta’kidlagan.
