O‘zbekistonda askarlarga imtiyozli kredit va masofaviy ta’lim imkoniyati beriladi

 

O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Shavkat Mirziyoyev 6-aprel kuni mamlakat mudofaa qobiliyatini mustahkamlash va harbiy xizmatchilarni qo‘llab-quvvatlash masalalari yuzasidan yig‘ilish o‘tkazdi.

 

Yig‘ilishda muddatli harbiy xizmatga chaqirilgan yoshlarga kasb-hunar egallash, oliy ta’lim olish va kitobxonlikni ommalashtirish yuzasidan ishlab chiqilgan takliflar koʻrib chiqildi.

 

Jumladan, 2026-2027 oʻquv yilidan boshlab muddatli harbiy xizmatga chaqirilgan yoshlarga bir qator quyidagi imtiyoz hamda kafolatlar berilishi nazarda tutilmoqda:

 

• Harbiy xizmat davomida oliygohlarga masofaviy ta’lim olish imkoniyati yaratiladi.
• Askarlarga tayyorlash kurslari tashkil qilinadi va imtihonlarga tayyorlash tizimi yo‘lga qo‘yiladi.
• Shartnoma asosida o‘qiydiganlarga foizsiz imtiyozli kreditlar beriladi. Harbiy fakultet talabalariga tenglashtirish orqali o‘qishni tugatgandan so‘ng zaxiradagi leytenant unvoni taqdim etiladi.
• Sport musobaqalari va fan olimpiadalarida g‘olib bo‘lgan askarlar test sinovlarisiz qabul qilinadi.
• “Bitta askar – bitta kasb” tamoyili asosida 3–6 oylik kasb-hunar kurslari tashkil etiladi, maxsus sertifikatlar beriladi.
• Muddatli harbiy xizmatdan qaytgan yoshlarning kasb-hunar xarajatlari vaucher orqali qoplab beriladi.
• Davlat tashkilotlariga ishga kirish istagida bo‘lganlarga testlarda 10 foizlik imtiyoz ballari beriladi.
• Harbiy xizmatchilar o‘rtasida “Ma’naviyat qalqoni” kitobxonlik tanlovi joriy etiladi, yakuniy bosqich g‘oliblari elektromobil va diplom bilan taqdirlanadi.

 

Davlat rahbari ushbu chora-tadbirlarni ma’qullab, tegishli qarorlarni imzoladi. Yangi chora-tadbirlar mamlakat taraqqiyoti va yuqori bilimli, vatanparvar kadrlar zaxirasini shakllantirishga xizmat qilishi ta’kidlandi.