O‘zbekistonda mart oyida inflyatsiya 0,6 foizni tashkil etdi

O‘zbekistonda 2026-yil mart oyida iste’mol narxlari o‘rtacha 0,6 foizga oshdi. Bu haqda Milliy statistika qo‘mitasi ma’lum qildi.

 

Ma’lumotlarga ko‘ra, yillik iste’mol narxlari indeksi (INI) 107,1 foizni tashkil etgan. Bu ko‘rsatkich o‘tgan yilning shu davriga nisbatan 3,2 foiz bandga past (2025-yil mart oyida — 110,3 foiz).

 

Hisobotda qayd etilishicha, mart oyida oziq-ovqat mahsulotlari narxlari o‘rtacha 1,2 foizga oshgan. Shuningdek, nooziq-ovqat tovarlari 0,3 foizga, aholiga ko‘rsatiladigan pullik xizmatlar esa 0,2 foizga qimmatlashgan.

 

Oziq-ovqat mahsulotlari orasida pomidor (11,5 foiz) , bulg‘or qalampiri (10,0 foiz), kartoshka (9,8 foiz), qovoq (9,4 foiz), olma (7,4 foiz), banan (6,0 foiz) va limon (4,4 foiz) narxlarining o‘sishi inflyatsiyaga asosiy ta’sir ko‘rsatgan. 

 

Shuningdek, tovuq tuxumi (2,1 foiz), mol go‘shti (1,8 foiz), baliq (1,7 foiz), shakar (1,7 foiz), qo‘y go‘shti (1,2 foiz), kungaboqar yog‘i (1,0 foiz), umumiy ovqatlanish shoxobchalaridagi tayyor taomlar (0,8 foiz) va birinchi navli bug‘doy uni (0,6 foiz) narxlari ham oshgan.

 

Ayni paytda, bodring narxi 20,7 foizga, karam 4,7 foizga va piyoz 4,6 foizga arzonlashib, inflyatsiya darajasini pasaytiruvchi omil sifatida qayd etilgan.

 

Nooziq-ovqat tovarlari segmentida tomir kengaytiruvchi preparatlar (0,9 foiz), ayollar ko‘ylaklari (0,8 foiz) va sement (0,8 foiz) narxlari oshgan. Shu bilan birga, propan 3,2 foizga, AI-92 benzini esa 0,9 foizga arzonlagan.

 

Xizmatlar sohasida maishiy chiqindilar uchun to‘lov va bo‘yash ishlari xizmatlari narxlari 0,9 foizga oshgan bo‘lsa, ichki va xalqaro yo‘lovchi havo transporti tariflari 4,1 foizga pasaygan.

 

Qayd etilishicha, hisob-kitoblar 10 mingdan ortiq savdo va xizmat ko‘rsatish nuqtalarida qayd etilgan qariyb 1,2 millionta narxlar asosida amalga oshirilgan. Tahlil doirasida 419 turdagi tovarlar va 98 turdagi xizmatlar qamrab olingan.