O‘zbekistonda un ishlab chiqaruvchi 29 ta korxona birja savdolaridan chetlashtirildi

Raqobat qo‘mitasi tomonidan ichki bozorda bug‘doy mahsulotlari narxlarini barqarorlashtirish yuzasidan o‘tkazilgan monitoringlar natijasida qonunchilik talablarini buzgan bir qator xo‘jalik yurituvchi subyektlar birja savdolaridan chetlashtirildi.

 

Qo‘mita ma’lumotiga ko‘ra, amaldagi tartibga muvofiq bug‘doy va un mahsulotlari yuqori likvidli hamda ijtimoiy ahamiyatga ega tovarlar qatoriga kiritilgan bo‘lib, ularni sotish faqat birja savdolari orqali amalga oshirilishi belgilangan. Davlat resursi hisobidan xarid qilingan bug‘doydan ishlab chiqarilgan un mahsulotlarini belgilangan hajmlarda birja orqali sotish majburiy hisoblanadi.

 

Dastlabki monitoringlar davomida ayrim korxonalar tomonidan ichki bozor uchun ishlab chiqarilgan un mahsulotlarini birja savdolariga chiqarmaslik holatlari aniqlangan. 

 

Shu munosabat bilan, 2026-yil 3-apreldan boshlab davlat resursi bug‘doyidan ishlab chiqarilgan unni birjaga qayta joylashtirmagan yoki talab darajasida sotuvga chiqarmagan 29 ta korxonaga nisbatan chora ko‘rilgan.

 

Shuningdek, joriy yilning birinchi choragi yakunlari bo‘yicha davlat resursidan xarid qilingan bug‘doydan ishlab chiqarilgan unni birja orqali sotish tartibiga rioya etmagan 25 ta korxonaga nisbatan ish qo‘zg‘atilib, tegishli ta’sir choralarini qo‘llash bo‘yicha qarorlar qabul qilingan.

 

Raqobat qo‘mitasi ichki bozorda narxlar barqarorligini ta’minlash maqsadida davlat resursi bug‘doyini xarid qilgan korxonalar uchun un mahsulotlarini belgilangan hajmlarda birja savdolariga chiqarish majburiy ekanini eslatdi. 

 

Qonunchilik talablari buzilgan taqdirda esa qat’iy choralar ko‘rilishi ma’lum qilindi.