Qashqadaryo viloyati hokimi Dehqonobodda “drayver” loyihalar ijrosi bilan tanishdi
Tashrif davomida aholi uchun sayyor qabul o‘tkazilib, fuqarolar murojaatlari ko‘rib chiqildi.
Murotjon Azimov Qashqadaryo viloyatining Dehqonobod tumanida olib borilayotgan ijtimoiy-iqtisodiy islohotlar, hududiy rivojlanish dasturlari hamda “drayver” loyihalar ijrosi bilan yaqindan tanishdi.
Tashrif avvalida tuman hududidagi mavjud imkoniyatlar, istiqboldagi rejalar va ustuvor yo‘nalishlar yuzasidan tayyorlangan taqdimot ko‘rib chiqildi. Unda tumanda amalga oshirilishi rejalashtirilgan infratuzilma loyihalari, investitsiya tashabbuslari, “Yangi O‘zbekiston” massividagi qurilish ishlari, shuningdek, eski ko‘p qavatli uylarni renovatsiya qilish masalalari muhokama qilindi.
Shundan so‘ng viloyat hokimi tomonidan fuqarolar uchun sayyor qabul tashkil etilib, aholi murojaatlari tinglandi. Bildirilgan muammolarni bartaraf etish hamda dolzarb masalalarni hal qilish bo‘yicha mas’ullarga tegishli topshiriqlar berildi.
Tuman markazida yoshlar bilan ochiq muloqot ham o‘tkazildi. Unda yoshlarning taklif va tashabbuslari tinglanib, ularni qo‘llab-quvvatlash, bandlikni ta’minlash, ta’lim imkoniyatlarini kengaytirish va tadbirkorlik faoliyatini rivojlantirish masalalari muhokama qilindi.
Tashrif davomida hududda amalga oshirilayotgan bunyodkorlik ishlari ham o‘rganildi. Xususan, M‑39 avtomobil yo‘li bo‘yida olib borilayotgan qurilish ishlari, piyodalar va velosiped yo‘laklarini barpo etish loyihalarining borishi joyiga chiqib ko‘zdan kechirildi.
O‘rganishlar yakunida viloyat hokimi barcha yo‘nalishlarda ishlarni samarali tashkil etish, belgilangan muddatlarga qat’iy rioya qilish hamda hududni kompleks rivojlantirish bo‘yicha mas’ullarga aniq vazifalar yukladi.
