Qashqadaryoda imom-xatib kaltaklangani haqidagi xabar rad etildi
Holat yuzasidan viloyat Ichki ishlar boshqarmasi munosabat bildirdi.
Ijtimoiy tarmoqlarda Qashqadaryo viloyatining Muborak tumanidagi “Xitoy” jome masjidida imom-xatib bir guruh shaxslar tomonidan kaltaklangani aks etgani aytilgan video tarqaldi. Holat yuzasidan viloyat ichki ishlar organlari rasmiy munosabat bildirdi.
Ma’lum qilinishicha, o‘rganishlar jarayonida videoda “imom-xatib” sifatida ko‘rsatilgan shaxs aslida masjidga namoz o‘qish uchun kelgan oddiy fuqaro ekani aniqlangan.
Dastlabki ma’lumotlarga ko‘ra, joriy yilning 3-aprel kuni soat taxminan 13:40 larda masjidga kelgan fuqaro J. va yana ikki nafar fuqaro o‘rtasida o‘zaro janjal yuzaga kelgan. Oqibatda fuqaro J. yengil tan jarohati olgan.
Hozirda mazkur holat yuzasidan Muborak tuman Ichki ishlar bo‘limi huzuridagi tergov bo‘linmasi tomonidan ikki nafar shaxsga nisbatan Jinoyat kodeksining 277-moddasi (Bezorilik) 2-qismi bilan jinoyat ishi qo‘zg‘atilgan.
Ayni paytda holat bo‘yicha tergov harakatlari davom ettirilmoqda.
