Barcha davlat idoralarida haftada bir kun sport kuni bo‘ladi
Xodimlari uchun sport zali yoki maydoncha qurgan tadbirkorlarga soliq imtiyozlari beriladi.
Shavkat Mirziyoyev raisligida jismoniy tarbiya va sport sohasidagi ustuvor vazifalarga bag‘ishlangan videoselektor yig‘ilishi o‘tkazildi.
Yig‘ilishda davlat boshqaruvi organlari rahbarlari sportni ommalashtirishda shaxsiy namuna ko‘rsatishi zarurligi ta’kidlandi. Xususan, har bir vazir, tarmoq va bank rahbari, viloyat hamda tuman hokimlari xodimlarning sport bilan muntazam shug‘ullanishi uchun sharoit yaratishi lozimligi qayd etildi.
Shu maqsadda haftada bir kun sport kuni sifatida belgilanishi va bu kunda vazirlik, idora hamda tashkilotlarda sport mashg‘ulotlari o‘tkazilishi belgilandi. Agar muassasalarda sport zallari mavjud bo‘lmasa, sport bazalari yoki federatsiyalar bilan shartnomalar tuzish orqali mashg‘ulotlarni tashkil etish topshirildi.
Bundan tashqari, kamida to‘rtta sport turi bo‘yicha yiliga ikki marotaba musobaqalar tashkil etish hamda g‘oliblarni munosib rag‘batlantirish vazifasi qo‘yildi.
Joriy yildan boshlab vazirliklar, tarmoqlar, banklar va hokimliklar o‘rtasida har yili respublika birinchiliklarini o‘tkazish ham rejalashtirilmoqda.
Yig‘ilishda xususiy sektorda ham ommaviy sportni rivojlantirish bo‘yicha qo‘shimcha imkoniyatlar yaratilishi qayd etildi. Jumladan, tadbirkorlar o‘z ishchi-xodimlari uchun sport zali yoki sport maydonchasi qurish hamda ularni jihozlash uchun sarflagan xarajatlarini foyda solig‘i bazasidan chegirish imkoniyatiga ega bo‘ladi.
Shuningdek, bunday sport infratuzilmasida faoliyat yuritadigan trenerlar uchun daromad solig‘i va ijtimoiy soliq stavkasi 1 foiz etib belgilanadi.
