Bugun kechqurun butun sivilizatsiya yo‘q bo‘lishi mumkin — Tramp Eronga so‘nggi ogohlantirish berdi
AQSh prezidenti Eronni Hormuz bo‘g‘ozini ochish va tinchlik shartnomasini tuzish talablarini bajarishga chaqirdi,agar shartlar bajarilmasa halokatli oqibatlar yuzaga kelishi mumkinligini ogohlantirdi.
AQSh prezidenti Donald Tramp Eron hukumatiga so‘nggi ogohlantirish berdi. Oq uy rahbari ijtimoiy tarmoq Truth Social orqali, agar Eron AQSh talab qilgan Hormuz bo‘g‘ozini ochish va tinchlik shartnomasini tuzish shartlarini bajarmasa, yuzaga kelishi mumkin bo‘lgan halokatli oqibatlar haqida ogohlantirdi.
AQSh ma’muriyati tomonidan belgilangan muddat 7-aprel kuni Vashington vaqti bilan 20:00 da tugaydi. Tramp shartlar bajarilmasa, Eronning ko‘priklari va energetika infratuzilmasiga kuchli zarba berilishi bilan tahdid qildi.
Trampning so‘zlariga ko‘ra: “Bugun kechqurun butun bir sivilizatsiya yo‘q bo‘lib ketadi, hech qachon qayta tiklanmaydi. Men bunday bo‘lishini istamayman, lekin ehtimol shunday bo‘ladi”. Shu bilan birga u kelajakda rejim o‘zgarishi va inqilobiy jarayonlar sodir bo‘lishi mumkinligini ham qayd etdi.
Uning aytishicha, agar Eron belgilangan shartlarni bajarmasa, AQSh qurolli kuchlari Eron infratuzilmasi, jumladan ko‘priklar, elektr stansiyalari va boshqa obyektlarga qarshi zarbalar berishi mumkin. Eron hukumati esa bunday tahdidlarni qat’iy rad etib, suverenlikni himoya qilishga tayyor ekanini bildirgan .
