Eron AQShga urushni tugatish bo‘yicha 10 banddan iborat rejani taqdim etdi
Eron hujumlar to‘xtatilsa va sanksiyalar bekor qilinsa, Ho‘rmuz bo‘g‘ozini ochishini bildirgan.
Eron AQSh va Isroil bilan davom etayotgan mojaro fonida urushni to‘liq yakunlash bo‘yicha 10 banddan iborat rejani taqdim qildi. Bu haqda The New York Times xabar berdi.
Ma’lum qilinishicha, mazkur taklif Pokiston vositachiligida AQSh tomoniga yetkazilgan. Hujjatda Eronga qarshi har qanday hujumlarni to‘liq to‘xtatish va kelgusida qayta zarba berilmasligi bo‘yicha kafolat berish, Livanda “Hizbulloh”ga qarshi Isroil amaliyotlarini to‘xtatish hamda barcha iqtisodiy sanksiyalarni bekor qilish talablari ilgari surilgan. Buning evaziga Eron Ho‘rmuz bo‘g‘ozi orqali o‘tuvchi muhim dengiz yo‘liga qo‘ygan amaldagi blokadasini bekor qiladi.
Shuningdek, har bir kema uchun taxminan 2 million dollar miqdorida to‘lov joriy etilishi va bu mablag‘ Ummon bilan taqsimlanishi rejalashtirilgan. Eron ushbu daromadni AQSh va Isroil zarbalari natijasida vayron bo‘lgan infratuzilmani tiklashga yo‘naltiradi va AQShdan kompensatsiya talab qilmaydi.
AQSh prezidenti Donald Tramp ushbu taklifni “muhim qadam” deb baholagan, biroq uni yetarli emasligini ta’kidlagan.
Avvalroq Tramp Eron Hormuz bo‘g‘ozini ochmasa, mamlakatdagi muhim infratuzilma obyektlariga zarba berilishi mumkinligini bildirgan edi. U belgilangan muddatgacha talablar bajarilmasa, keng ko‘lamli havo hujumlari amalga oshirilishini ham ma’lum qilgan.
Eron davlat OAVlari esa taklif o‘t ochishni vaqtinchalik to‘xtatishni emas, balki urushni to‘liq yakunlashni nazarda tutishini bildirgan.
Shuningdek, xabarda rasmiy Tehron o‘z pozitsiyasida qat’iy turayotgani, xususan Ho‘rmuz bo‘g‘ozida yuk tashish jarayonlariga jiddiy ta’sir ko‘rsata olgani qayd etilgan.
Eslatib o‘tamiz, avvalroq AQSh ham Eron tomoniga 15 banddan iborat taklif yuborgan, biroq Tehron uni rad etgan va o‘z takliflarini ilgari surgan.
