Eron bir kechada yo‘q qilinishi mumkin — Tramp
Tramp seshanba tunigacha Erondagi barcha ko‘priklar va elektr stansiyalari yo‘q qilinishi mumkinligini aytdi.
AQSH prezidenti Donald Tramp Oq uydagi brifingda Eronga nisbatan keskin bayonotlar berib, Vashingtonda qisqa muddat ichida mamlakat infratuzilmasini yo‘q qilish rejasi mavjudligini bildirdi. Shu bilan birga, u Tehron muzokaralarda ishtirok etayotganini ham ta’kidladi.
Trampning ma’lum qilishicha, AQSHda shunday harbiy reja borki, unga ko‘ra seshanba yarim tungacha Erondagi ko‘priklar va elektr stansiyalariga zarba berilishi mumkin. Uning so‘zlariga ko‘ra, bunday operatsiya bir necha soat ichida amalga oshirilishi ehtimoldan xoli emas.
Brifingda ishtirok etgan AQSH mudofaa vaziri Pit Hegset harbiy harakatlar ko‘lami ortib borayotganini bildirib, yaqin kunlarda zarbalar yanada kuchayishini aytdi.
Shu bilan birga, Tramp Eronni mojaroni to‘xtatishga qaratilgan muzokaralarda “faol ishtirokchi” deb atadi. Uning aytishicha, vositachilar orqali olib borilayotgan muloqotlar ijobiy baholanmoqda, ammo kelishuv shartlari to‘liq ochiqlanmagan.
AQSH prezidenti Eron rahbariyati AQSH talablarini bajarmasa, infratuzilma obyektlariga zarba berish ehtimolini istisno qilmadi. U bu kabi harakatlar yuzasidan xalqaro ayblovlardan xavotir bildirmadi.
Shuningdek, Tramp AQSH tomonidan Eron hukumatiga qarshi namoyishchilarni qo‘llab-quvvatlash maqsadida qurol yuborilganini, ammo ular belgilangan manzilga bormaganini ma’lum qildi. U bu holatda ayrim vositachilarni ayblab, ular javobgarlikka tortilishi mumkinligini ta’kidladi.
Prezidentning aytishicha, AQSH razvedkasi tomonidan olingan ma’lumotlarga ko‘ra, ayrim eronliklar tashqi bosimlarga qaramay, o‘z pozitsiyalarida qolishga tayyor ekanini bildirgan.
