Isroil G‘azodagi maktab yaqiniga zarba berdi

Dushanba kuni G‘azo sektorida ko‘chirilgan falastinliklar joylashgan maktab yaqinida amalga oshirilgan Isroil havo zarbasi oqibatida kamida 10 kishi halok bo‘ldi, yana bir nechta odam yaralandi. Bu haqda Reuters xabar bermoqda.

 

Tibbiyot xodimlarining ma’lum qilishicha, hujum markaziy G‘azodagi Mag‘oziy qochqinlar lageri sharqida, aholi zich joylashgan hududda sodir etilgan. 

 

Shifokorlar va mahalliy aholi vakillarining aytishicha, hujumdan oldin falastinliklar va Isroil qo‘llab-quvvatlayotgan militsiya a’zolari o‘rtasida to‘qnashuv yuzaga kelgan. Ular mazkur guruh maktabga hujum qilib, ayrim odamlarni o‘g‘irlab ketmoqchi bo'lganini bildirgan.

 

To‘qnashuvlar davomida Isroil hududga ikkita raketa uchirgan. Guvohning so‘zlariga ko‘ra, militsiya a’zolari hududga kirib kelganidan so‘ng o‘q uzishni boshlagan, aholi esa o‘zlarini himoya qilishga uringan.

 

Keyinroq, Isroil qo‘llab-quvvatlayotgan militsiya rahbarlaridan biri videomurojaatda (uning haqiqiyligi hozircha tasdiqlanmagan) besh nafar HAMAS a’zosi o‘ldirilganini ma’lum qildi. HAMAS bu bayonotga izoh bermagan.

 

Avvalroq shu kuni G‘azo shahrida mototransportda ketayotgan bir falastinlik Isroil zarbasi natijasida halok bo‘lib, bir bola yaralangan. Shuningdek, markaziy G‘azoda avtomobilga o‘q uzilishi natijasida yana bir kishi halok bo‘lgan. Shu tariqa kun davomida qurbonlar soni kamida 12 nafarga yetgan.