Isroildagi Oʻzbekiston fuqarolariga xavfsizlik choralarini kuchaytirish tavsiya qilindi
Elchixona vatandoshlarni havo hujumi signalizatsiyasi va rasmiy ko‘rsatmalarga qat’iy rioya qilishlari lozimligini ta'kidladi.
Oʻzbekistonning Isroildagi elchixonasi mamlakatdagi xavfsizlik vaziyatining yomonlashishi ehtimoli yuzasidan vatandoshlariga rasmiy murojaat qildi. Elchixona barcha Oʻzbekiston fuqarolarini Isroil Ichki front qo‘mondonligining ko‘rsatmalariga qat’iy rioya qilishga chaqirdi.
Bayonotda shuningdek, vatandoshlar uchun quyidagi tavsiyalar berilgan:
- Har doim boshpanalarga yaqin bo‘lish;
- Havo hujumi signalizatsiyasi yoki sirena chalinganda xavfsiz joyga o‘tish;
- Ichki front qo‘mondonligining rasmiy ruxsati bo‘lmaguncha boshpanadan chiqmaslik;
- Rasmiy e’lonlar va favqulodda vaziyatlar bo‘yicha ko‘rsatmalardan xabardor bo‘lish.
Shoshilinch murojaatlar uchun Oʻzbekiston elchixonasi quyidagi telefon raqamlari orqali faoliyat yuritmoqda: 03-672-2466, 03-672-2371, 03-758-5075 va 03-758-5076. Favqulodda va tezkor vaziyatlarda +972 54-4851397 raqamiga qo‘ng‘iroq qilish mumkin. Shuningdek, murojaatlar il.uzembassy@mfa.uz elektron pochta manzili orqali ham qabul qilinadi.
Elchixona barcha vatandoshlarni xavfsizlik choralariga qat’iy rioya qilishga chaqiradi va vaziyatni diqqat bilan kuzatib boradi.
