O‘zbekistonda chet tillari o'quv markazlarini ochish bo‘yicha imtiyozlar kengaytiriladi
30 yoshdan oshganlarga ham o‘quv markazi ochishda 120 mln so‘mgacha ssuda ajratiladi.
O‘zbekistonda chet tillariga ixtisoslashgan o‘quv markazlarini tashkil etish bo‘yicha imtiyozli shartlar doirasi kengaytiriladi. Bu haqda "Huquqiy axborot" Telegram-kanali xabar berdi.
Hujjatga ko‘ra, yangi ishlanmalarga asoslangan “spin-off” korxonalar reyestri joriy etiladi. Reyestrga kiritilgan, patentlangan ilmiy tadqiqotlar natijasida yaratilgan ishlanmalar asosida mahsulot ishlab chiqarishni yo‘lga qo‘ygan korxonalar hamda ularning xodimlariga 2017-yil 30-iyundagi PF–5099-son farmonda nazarda tutilgan imtiyoz va preferensiyalar tatbiq etiladi.
Shuningdek, patent olinmagan ilmiy ishlanmalar asosida faoliyat yuritayotgan korxonalar 2026-yil 1-maydan 2029-yil 1-maygacha foyda solig‘ini amaldagi stavkadan 50 foiz kamaytirilgan holda to‘laydi.
Farmonga muvofiq, 2026-yil 1-maydan boshlab olimlar va tadbirkorlar tomonidan davlat ilmiy dasturlari doirasida amalga oshirilgan fundamental, amaliy va innovatsion loyihalar natijasida yaratilgan ishlanmalar bo‘yicha tajriba-sinov ishlari xarajatlarining bir qismi Ilm-fanni moliyalashtirish va innovatsiyalarni qo‘llab-quvvatlash jamg‘armasi hisobidan qoplanadi.
Bundan tashqari, xorijiy til bo‘yicha kamida C1 darajadagi milliy yoki xalqaro sertifikatga ega yoshlarga olis va borish qiyin hududlarda o‘quv markazlari ochish uchun beriladigan imtiyozli shartlar kengaytirilmoqda.
Endilikda bunday foizsiz ssudalar 30 yoshdan oshgan shaxslarga ham taqdim etiladi. Mazkur kreditlar 6 oylik imtiyozli davr bilan 3 yil muddatga, bazaviy hisoblash miqdorining 320 baravarigacha ajratiladi.
