O‘zbekistonda harbiy xizmatchilarning pensiya miqdori oshirilishi mumkin
Mazkur imtiyoz 30 yildan ortiq xizmat qilgan harbiylar uchun qo‘llaniladi.
O‘zbekistonda harbiy xizmatchilar va ularning oila a’zolarini pensiya bilan ta’minlash tizimini takomillashtirishga qaratilgan qonun loyihasi birinchi o‘qishda ko‘rib chiqildi.
Qonun loyihasiga ko‘ra, harbiy xizmatchilar (xodimlar) va ularning oila a’zolarini davlat pensiyalari bilan ta’minlashning huquqiy asoslarini qonun darajasida belgilash, shuningdek, pensiya tayinlash shartlari, turlari, miqdorlari hamda tartibiga oid normalarni yanada takomillashtirish nazarda tutilmoqda.
Xususan, harbiy xizmatda 30 yildan ortiq xizmat qilganlar uchun pensiyaning bazaviy miqdorini aniqlashda ish haqining hisobga olinadigan miqdorini 75 foizdan 100 foizga oshirish taklif etilmoqda.
Bundan tashqari, pensiya tayinlashda asos bo‘ladigan pensiyani hisoblash bazaviy miqdorini 10 baravaridan kelib chiqib hisoblash amaliyotini 12 baravaridan kelib chiqib amalga oshirish taklif etilmoqda.
Qonun loyihasida taqdim etilayotgan ushbu imtiyozlar uzoq yillar davomida mamlakat xavfsizligini ta’minlash yo‘lida xizmat qilgan harbiy xizmatchilarni qo‘shimcha rag‘batlantirishga qaratilgani qayd etildi.
Majlisda qonun loyihasi deputatlar tomonidan birinchi o‘qishda qabul qilindi.
