O‘zbekistonda yuqori natija ko‘rsatgan sport maktablari 500 million so‘m bilan mukofotlanadi
Prezident sport maktablari faoliyatidagi kamchiliklarni tanqid qilib, murabbiylar faoliyati sportchilar natijasi bilan baholanishi kerakligini ta’kidladi.
Shavkat Mirziyoyev raisligida jismoniy tarbiya va sport sohasidagi ustuvor vazifalarga bag‘ishlangan videoselektor yig‘ilishida ixtisoslashgan sport maktablari faoliyati tahlil qilinib, ayrim hududlarda ularning natijalari oddiy sport maktablaridan deyarli farq qilmayotgani tanqid qilindi.
Misol sifatida, Termiz shahridagi to‘rtta ixtisoslashgan sport maktabining natijalari Jarqo‘rg‘on tumanidagi bitta sport maktabi darajasiga ham yetmayotgani qayd etildi. Xususan, Jarqo‘rg‘on sport maktabi o‘tgan yili Osiyo va jahon chempionatlarida 6 ta sovrinni qo‘lga kiritgan bo‘lsa, viloyatdagi to‘rtta ixtisoslashgan maktab hisobida atigi bitta medal mavjud.
Yig‘ilishda har bir ixtisoslashgan sport maktabi direktori, murabbiylari va jamoasi ish uslubini tubdan o‘zgartirishi, o‘sish nuqtalarini aniq belgilashi zarurligi ta’kidlandi. Shuningdek, murabbiylar va rahbarlarning oylik maoshi sportchilar erishayotgan natijalarga bog‘lanishi lozimligi qayd etildi.
Mutasaddilarga yuqori natijalarga erishgan sport maktablarini amaldagi rag‘batlantirish tizimidan tashqari qo‘shimcha ravishda 500 million so‘mdan alohida mukofotlash tizimini joriy etish topshirildi.
Yig‘ilishda sport federatsiyalari faoliyati ham tanqid qilindi. Xususan, federatsiyalar tomonidan hamkorlar topish, moliyaviy manbalarni kengaytirish va tadbirkorlarni sportga jalb etish borasida tashabbuslar yetishmayotgani qayd etildi.
Ta’kidlanishicha, mamlakatda sportga qiziqadigan va homiylik qilishga tayyor tadbirkorlar soni ortib bormoqda. Biroq hozirgacha birorta federatsiya tadbirkorlar bilan o‘zaro manfaatli hamkorlik bo‘yicha aniq takliflar kiritmagan.
Shu munosabat bilan mutasaddilarga 26 ta sport federatsiyasidagi bosh kotiblar va boshqaruv kadrlari faoliyatini chuqur o‘rganib chiqish, lavozimiga loyiq bo‘lmagan rahbarlarni almashtirish bo‘yicha tegishli choralar ko‘rish topshirildi.
