O‘zbekistondagi ayrim OTMlarda talabalarning 70 foizi jismoniy normativ topshira olmagan
Shavkat Mirziyoyev rektorlarga sport bo‘yicha bir yillik aniq reja ishlab chiqishni topshirdi.
Prezident Shavkat Mirziyoyev raisligidagi videoselektor yig‘ilishida oliy ta’lim muassasalarida sport yo‘nalishidagi ishlar yetarli darajada emasligi tanqid qilindi.
Ma’lum qilinishicha, oliygohlarda sport federatsiyalari bilan hamkorlik sust bo‘lib, iqtidorli talabalar bilan individual ishlash tizimi ham yetarli darajada yo‘lga qo‘yilmagan.
Shu bilan birga, ayrim oliy ta’lim muassasalarida ijobiy tajribalar ham mavjud. Xususan, Termiz davlat universitetida 4 ta sport klubi tashkil etilib, 5 ming talaba 18 ta sport turiga jalb qilingan. Talabalar o‘tgan yili xalqaro musobaqalarda 18 ta medalni qo‘lga kiritgan. Universitetning voleybol va gandbol jamoalari oliy ligada, futzal va futbol jamoalari esa birinchi ligada ishtirok etmoqda.
Biroq ayrim oliygohlarda ahvol qoniqarsizligicha qolmoqda. Jumladan, Jizzax politexnika instituti, Toshkent tibbiyot universitetining Termiz filiali, Qarshi davlat texnika universiteti hamda Buxoro davlat universitetida talabalarining qariyb 70 foizi jismoniy normativlarni bajara olmagan. Bu esa mazkur oliygohlarda sport klublari faoliyati samarasiz ekanini ko‘rsatadi.
Shu munosabat 207 ta oliygoh rektorlariga Termiz davlat universitetining tajribasini o‘rgatish va sport bo‘yicha bir yillik reja ishlab chiqish topshirildi.
