Shavkat Mirziyoyev topshirig‘i ijrosi doirasida ichki ishlar xodimlari uchun maxsus o‘quv kurslari boshlandi
Mashg‘ulotlarga davlat organlari, sud-huquq tizimi vakillari, ekspertlar hamda malakali professor-o‘qituvchilar jalb etilgan.
Prezident Shavkat Mirziyoyev raisligida o‘tkazilgan videoselektor yig‘ilishida berilgan topshiriqlar ijrosi doirasida Davlat siyosati va boshqaruvi akademiyasida ichki ishlar organlari xodimlari uchun maxsus o‘quv kurslari boshlandi.
Ma’lum qilinishicha, uch kunlik mashg‘ulotlar xodimlarning aholi bilan samarali muloqot qilish, murojaatlarni tizimli hal etish, shuningdek kasbiy va psixologik tayyorgarligini oshirishga qaratilgan.
Dastur doirasida tinglovchilar fuqarolar bilan ishlashning zamonaviy yondashuvlari, huquqbuzarliklarning oldini olish, tergov jarayonlarida qonuniylikni ta’minlash hamda korrupsiyaga qarshi kurashish mexanizmlarini o‘rganmoqda.
Mashg‘ulotlarga davlat organlari, sud-huquq tizimi vakillari, ekspertlar hamda malakali professor-o‘qituvchilar jalb etilgan. Ta’lim jarayoni amaliy keyslar va simulyatsion vaziyatlar asosida tashkil etilgani qayd etilmoqda.
Prezident Shavkat Mirziyoyev raisligida 2026-yil 13-mart kuni aholi murojaatlari bilan ishlash tizimini takomillashtirish, Xalq qabulxonalari faoliyatini yangi bosqichga olib chiqish va jamoatchilik fikrini chuqur tahlil qilish masalalari yuzasidan videoselektor yig‘ilishi bo‘lib o‘tgan edi.
Mazkur yig‘ilishida Prezident Virtual va Xalq qabulxonalariga ichki ishlar organlari faoliyatiga oid murojaatlar haligacha ko‘plab tushayotgani, ayrim hollarda xodimlar muomalasi va xizmat faoliyati yuzasidan salbiy fikrlar bildirilayotgani tanqidiy muhokama qilingan edi.
