Toshkent viloyatidagi bogʻchada bolani haqorat qilib urgan tarbiyachi ishdan bo‘shatildi
Tarbiyachi bolaning uxlamaganidan norozi bo‘lib, uni “urod” deb haqorat qilgan va urgan.
Toshkent viloyatining Ohangaron shahridagi maktabgacha ta’lim muassasalaridan birida tarbiyachi tomonidan kichik yoshli bolaga nisbatan jismoniy kuch ishlatilgani va u haqorat qilingani ma’lum bo‘ldi. Mazkur holat yuzasidan tarbiyachi bilan tuzilgan mehnat shartnomasi bekor qilinib, u ishdan bo‘shatilgan.
Kun.uzning ma'lum qilishicha, voqea Ohangaron shahridagi 10-sonli davlat maktabgacha ta’lim muassasasida sodir bo‘lgan.
Tarbiyachi bolaning uxlamaganidan norozi bo‘lib, uni “urod” deb haqorat qilgan hamda unga nisbatan jismoniy kuch ishlatgan. U ushbu jarayonni tasvirga olib, tanishiga yuborgan.
Bildirilishicha, tarbiyachi Sh.A. bolaga nisbatan jismoniy kuch ishlatgani hamda tarbiyalanuvchining sha’ni va qadr-qimmatini tahqirlovchi munosabatda bo‘lgani sababli 2026-yil 6-aprel kuni u bilan tuzilgan mehnat shartnomasi bekor qilinib, ishdan bo‘shatilgan.
Bolalar ombudsmani ushbu harakatlar bolaga nisbatan zo‘ravonlik va uning sha’ni hamda qadr-qimmatini kamsitish sifatida baholanishini ta’kidladi.
Hozirda mazkur holat yuzasidan Ohangaron shahar ichki ishlar organlari tomonidan tergovga qadar tekshiruv ishlari olib borilmoqda.
Qayd etilishicha, bola manfaatlarini himoya qilish maqsadida ushbu ish Bolalar ombudsmani nazoratiga olingan. Holat bo‘yicha qo‘shimcha ma’lumotlar keyinchalik taqdim etilishi kutilmoqda.
