Toshkentda ikkita avtobusda yong‘in yuzaga keldi
Holat yuzasidan rasmiy ma’lumot berildi.
Toshkent shahrida 6-aprel kuni “Mercedes-Benz” rusumli ikkita yo‘lovchi avtobusida yong‘in va tutun chiqishi holatlari qayd etildi. Holatlar yuzasidan “Toshshahartransxizmat” AJ rasmiy ma’lumot berdi.
Ma’lum qilinishicha, birinchi hodisa soat 18:45 atrofida Sergeli tumani, Yangi Sergeli ko‘chasida sodir bo‘lgan. 2012-yilda ishlab chiqarilgan, “4-avtobus saroyi” tasarrufidagi, davlat raqami 01/916 OJA bo‘lgan 143-sonli yo‘nalish avtobusida elektr kabellarining qisqa tutashuvi natijasida yong‘in yuzaga kelgan. Haydovchi F.A. dastlabki o‘t o‘chirish vositasi bilan yong‘inni bartaraf etishga uringan, biroq alanga kuchaygan. Shundan so‘ng voqea joyiga FVV yong‘in-qutqaruv bo‘linmalari yetib kelib, yong‘inni qisqa vaqt ichida o‘chirishga muvaffaq bo‘lgan. Hodisa oqibatida jabrlanganlar yo‘q, avtobusga texnik zarar yetgan.
Ikkinchi holat esa shu kuni soat 21:55 da Qibray tumanidagi “Qashqarlik” bekatida kuzatilgan. “8-avtobus saroyi” filialiga qarashli, davlat raqami 01|988 TCA bo‘lgan, 169-sonli yo‘nalishda harakatlangan 2012-yilda ishlab chiqarilgan avtobusda motor qismidagi elektr simlarining qisqa tutashuvi sabab tutun chiqishi aniqlangan. Haydovchi A.U. vaziyatni tezkor baholab, zarur choralarni ko‘rgan va tutash holatini bartaraf etgan. Ushbu hodisada ham jabrlanganlar yo‘q, avtobus texnik shikastlangan.
Hozirda har ikkala holat yuzasidan mutaxassislar tomonidan xizmat tekshiruvlari olib borilmoqda hamda texnik nosozliklarni bartaraf etish ishlari davom etmoqda.
Avtobuslar to‘liq soz holatga keltirilgach, belgilangan tartibda yana yo‘nalishlarga chiqarilishi rejalashtirilgan.
