Toshkentdagi “Beshqo‘rg‘on” bozorida yong‘in xavfsizligi qoidalari buzilgani aniqlandi
Bozorning ish faoliyati vaqtincha to‘xtatildi.
“Beshqo‘rg‘on” bozoridagi avtomatik yong‘in o‘chirish tizimi nosoz holatda ekanligi aniqlandi. Bu haqda FVV xabar berdi.
Ma’lum qilinishicha, 5-aprel kuni Chilonzor tumanida joylashgan “Beshqo‘rg‘on” bozorida yong‘in sodir bo‘lganidan so‘ng, bozor hududi atrofidagi yoqilg‘i quyish shoxobchasi va savdo kompleksi tegishli tartibda Toshkent shahar FVBB tomonidan tekshirildi.
Tekshiruv davomida avtomobillarga yonilg‘i quyish shoxobchasidagi yonilg‘i saqlash sig‘imiga yaqin masofada joylashgan binodan omborxona sifatida foydalanilayotgani, savdo kompleksi binosidagi mavjud avtomatik yong‘in o‘chirish tizimi nosoz holatda ekanligi va shunga o‘xshash bir nechta yong‘in xavfsizligi qoidalarining qo‘pol ravishda buzilgani ma’lum bo‘lgan.
Barcha kamchiliklar to‘liq bartaraf etilgunga qadar bozorning ish faoliyati vaqtincha to‘xtatildi.
Eslatib o‘tamiz, 5-aprel soat 15:56 da Toshkent shahar Chilonzor tumani, Toshkent katta xalqa avtomobil yo‘li ko‘chasida joylashgan "Beshqo‘rg‘on" bozorida yong‘in sodir bo‘lgandi.
FVV majmuaning 3000 kv.m maydoni va moddiy boyliklari, shuningdek, unga tutash bo‘lgan hududdagi avtomobillarga yoqilg‘i quyish shoxobchasi hamda 5 qavatli avtoturargoh yong‘indan saqlab qolinganini ma’lum qilgandi.
