Ukraina Rossiyaga energetika obyektlariga o‘zaro hujumlarni to‘xtatishni taklif qildi
Moskva hozircha ushbu tashabbusga rasmiy munosabat bildirmagan.
Ukraina prezidenti Vladimir Zelenskiy Rossiyaga energetika infratuzilmasi obyektlariga hujumlarni o‘zaro to‘xtatish bo‘yicha sulh taklif qildi. Uning so‘zlariga ko‘ra, ushbu tashabbus AQSh vositachiligi orqali Rossiya tomoniga yetkazilgan.
Prezident agar Rossiya Ukraina energetika sektoriga hujumlarni to‘xtatsa, Kiyev ham shunga o‘xshash zarbalardan voz kechishga tayyor ekanini ta’kidlagan.
Zelenskiyning bayonoti Odessada sodir bo‘lgan dron hujumi ortidan yangragan. Hujum natijasida turar-joy binolari va energetika obyektlariga zarar yetgan. Uch kishi, jumladan bir bola halok bo‘lgan, yana 18 kishi jarohat olgan.
Ukraina prezidenti ta’kidlashicha, Kiyev avval ham bir necha bor gumanitar sulh tashabbuslarini ilgari surgan, jumladan diniy bayramlar davrida vaqtinchalik sulh e’lon qilish taklif qilingan. Biroq bu tashabbuslar hozircha qo‘llab-quvvatlanmagan.
Zelenskiy shuningdek, Ukraina Qurolli Kuchlari tomonidan Rossiyaning energetika infratuzilmasiga berilgan uzoq masofali zarbalar Rossiya iqtisodiyotiga sezilarli ta’sir ko‘rsatayotganini, xususan neftdan olinadigan daromadlarni kamaytirayotganini qayd etdi.
Reuters agentligi ma’lumotiga ko‘ra, mart oyida Ukraina hujumlari Rossiyaning bir qator yirik yoqilg‘i infratuzilmasi obyektlariga zarar yetkazgan.
Hozircha Moskva ushbu sulh tashabbusiga rasman javob bergani yo‘q.
