Venesuela prezidentligiga nomzod bo‘lishim mumkin — Tramp

AQSh prezidenti Donald Tramp Venesuela prezidentligiga nomzodini qo‘yishi mumkinligini bildirib, buning uchun ispan tilini “tezda o‘rganishini” aytdi. Bu haqda Fox News xabar berdi.

 

Ushbu bayonot dushanba kuni Eron hududida urib tushirilgan qiruvchi samolyotdan so‘ng bedarak yo‘qolgan AQSh Harbiy-havo kuchlari ofitserini qutqarish operatsiyasiga bag‘ishlangan matbuot anjumanida yangradi.

 

Trampning so‘zlariga ko‘ra, agar u Venesuelada saylovda qatnashsa, mamlakatda eng yuqori reytingga ega bo‘lishi mumkin. 

 

Prezident matbuot anjumani davomida Venesuela haqida bir necha bor to‘xtalib, AQShning ushbu davlatdagi harakatlarini tilga oldi. U Pasxa dam olish kunlaridagi qutqaruv operatsiyasini Venesuela prezidenti Nikolas Maduro qo‘lga olingani bilan solishtirdi hamda Venesuela bilan bog‘liq mojaro “45 daqiqada yakunlanganini” ta’kidladi. Shuningdek, AQSh ushbu mamlakatdan yuzlab million barrel neft olganini qayd etdi.

 

Avvalroq, hukumat yig‘ilishlaridan birida ham Tramp Venesuelada prezidentlik saylovida qatnashishi mumkinligini aytib, bu g‘oyani “ajoyib variant” deb atagan edi. U vaqtinchalik prezident Delsi Rodrigezga qarshi saylovda ishtirok etishini ham istisno qilmagan.

 

Shu bilan birga, Tramp o‘zining til o‘rganish qobiliyatini yuqori baholaganiga qaramay, o‘tgan oy Lotin Amerikasi yetakchilari bilan o‘tgan sammitda yangi til o‘rganishga vaqt ajratmasligini bildirgan edi. U o‘sha chiqishida AQSh davlat kotibi Marko Rubioning ispan tilini mukammal bilishini alohida ta’kidlagan.