Afg‘onistonda suv toshqinlari va ko‘chkilar qurbonlari soni 130 dan oshdi
12 kun davom etgan yomon ob-havo Afg‘onistonda minglab uylarning vayron bo‘lishiga sabab bo‘ldi.
Afg'onistonda kuchli yomg‘irlar oqibatida yuzaga kelgan suv toshqinlari va ko‘chkilar natijasida halok bo‘lganlar soni 130 nafardan oshdi. Bu haqda Sinxua axborot agentligi xabar berdi.
Agentlikning Milliy tabiiy ofatlarni boshqarish boshqarmasi ma’lumotlariga tayanib bildirishicha, tabiiy ofatlar oqibatida 132 kishi halok bo‘lgan, yana 192 kishi jarohat olgan.
Ma’lum qilinishicha, mamlakat hududida 12 kun davom etgan kuchli yog‘ingarchilik ko‘plab hududlarda suv toshqinlari va yer ko‘chishlariga sabab bo‘lgan. Natijada 5400 ga yaqin bino to‘liq yoki qisman vayron bo‘lgan.
Tabiiy ofat oqibatida ko‘plab chorva mollari ham nobud bo‘lgani qayd etilmoqda. Eng ko‘p zarar ko‘rgan hududlarga qutqaruv hamda gumanitar yordam guruhlari yuborilgan bo‘lib, hozirda yetkazilgan zararni aniqlash va jabrlanganlarga yordam ko‘rsatish ishlari davom etmoqda.
