Andijonda ayol haydovchi bolalarni bosib ketdi
Haydovchi e’tiborsizlik oqibatida yo‘l chetida o‘ynab turgan bolalarni ko‘rmay qolgan.
Ijtimoiy tarmoqlarda Andijonda Cobalt haydovchisining yo‘lakda turgan bolalarni urib yuborgani aks etgan videolar tarqaldi. Mazkur hodisa yuzasidan Andijon viloyati IIB rasmiy ma’lumot berdi.
Ma’lum qilinishicha, hodisa 2026-yil 3-aprel kuni soat 18:47larda Andijon shahridagi “Hamdo‘stlik” MFY Mustaqillik ko‘chasida sodir bo‘lgan. 1995-yilda tug‘ilgan haydovchi D.M. Cobalt rusumli avtomashinada harakatlanib kelayotib, e’tiborsizlik oqibatida yo‘l chetida turgan 2 nafar voyaga yetmagan bolani urib yuborgan.
Hodisa oqibatida jabrlangan bolalarga birinchi tibbiy yordam ko‘rsatilib, shifokorlar ko‘rigidan o‘tkazilgan. Ayni vaqtda ularning sog‘lig‘i yaxshi.
Mazkur holat yuzasidan Andijon shahar IIOFMB YHXB xodimi tomonidan sodir etilgan YTH bo‘yicha hujjatlar rasmiylashtirilib, surishtiruv ishlari olib borilmoqda.
