AQSh va Eron sulhga erishganidan so‘ng ham hujumlar davom etmoqda

Fors ko‘rfazi mintaqasida Eron va AQSH o‘rtasida ikki haftalik sulh e’lon qilinganiga qaramay, bir qator davlatlar o‘z hududlarida raketa va dron hujumlari kuzatilganini ma’lum qildi, deya xabar bermoqda Al Jazeera.

 

BAA Mudofaa vazirligiga ko‘ra, mamlakat havo mudofaa tizimlari Eron tomonidan uchirilgan ballistik va qanotli raketalar hamda dronlarni to‘sib qolgan. Mamlakatning turli hududlarida eshitilgan portlash ovozlari aynan ushbu to‘sib qolish jarayonlari bilan bog‘liq ekani qayd etilgan.

 

Kuvayt armiyasi ham ertalabdan boshlab jami 28 ta dron yo‘q qilinganini bildirdi. Ma’lum qilinishicha, ayrim dronlar muhim neft obyektlari, elektr stansiyalari va suvni tuzdan tozalash inshootlarini nishonga olgan. 

 

Bahrayn Ichki ishlar vazirligi esa Sitra hududida dron to‘sib qolinganda parchalar tushishi oqibatida ikki nafar fuqaro yengil jarohat olganini ma’lum qildi. 

 

Shuningdek, bir nechta uylarga zarar yetgan. Poytaxt Manamada portlash ovozlari eshitilgani, Sitra orolida esa tutun ko‘tarilgan.

 

Ayni paytda, Eron hozircha ushbu da’volarga rasmiy munosabat bildirmagan. Biroq mamlakat davlat telekanali Lavan orolidagi neftni qayta ishlash zavodi ham hujumga uchraganini ma’lum qildi. Yong‘inni o‘chirish ishlari olib borilayotgani, jabrlanganlar yo‘qligi aytilmoqda.

 

Vashington va Tehron o‘rtasidagi sulh AQSH prezidenti Donald Tramp tomonidan Eronga berilgan muddat tugashidan bir soat oldin e’lon qilingan edi.