Dunyoga o‘t qo‘yib, keyin chelak bilan kelganlarni olqishlamaymiz — Ispaniya Bosh vaziri
Pedro Sanches Yaqin Sharqda sulh o'rnatilgani haqidagi xabarlarga munosabat bildirdi.
Ispaniya bosh vaziri Pedro Sanches Eron atrofidagi mojaroda o‘t ochishni to‘xtatish haqidagi qarorga munosabat bildirdi. Shu bilan birga, u AQSH prezidenti Donald Trampga nisbatan tanqidiy pozitsiyasini saqlab qoldi.
Ispaniya hukumati rahbari X ijtimoiy tarmog‘idagi bayonotida sulh e’lon qilinishini “yaxshi yangilik” deb atab, mazkur qaror adolatli va barqaror tinchlikka olib kelsa qo‘llab-quvvatlanishini qayd etdi.
Biroq Sanches vaqtinchalik yengillik yuzaga kelgani mojaro oqibatlari — vayronagarchilik, tartibsizlik va boy berilgan insonlar hayotiga ko‘z yumishga asos bo‘la olmasligini ta’kidladi.
“Ispaniya hukumati dunyoni yoqib yuborib, keyin qo‘lida chelak bilan paydo bo‘lganlarni olqishlamaydi”, — deya yozdi u.
Sanches avval ham mazkur hujumlarni noqonuniy deb baholab kelgan. Unga ko‘ra, hozirgi vaziyatda asosiy e’tibor diplomatiya, xalqaro huquq va tinchlikni ta’minlashga qaratilishi lozim.
