Eron sulhni bekor qilishi mumkin — OAV
Tehron Livandagi vaziyat sabab sulh shartlarini qayta ko‘rib chiqmoqda.
Eron Isroilning Livanga uyushtirayotgan hujumlari davom etadigan bo‘lsa, AQSh bilan tuzilgan sulh kelishuvini bekor qilishi mumkin. Bu haqda The Wall Street Journal nashri vaziyatdan xabardor manbalarga tayanib xabar berdi.
Manbalarga ko‘ra, Tehron vositachilarga AQSh vakillari bilan Islomobodda o‘tkazilishi rejalashtirilgan muzokaralarda faqat Livanda ham sulh ta’minlangan taqdirdagina ishtirok etishini bildirgan. Shuningdek, Eron rasmiylari Hormuz bo‘g‘ozini qayta ochish bo‘yicha qabul qilingan qarorni ham qayta ko‘rib chiqish ehtimoli borligini ma’lum qilgan.
Xabarlarga ko‘ra, agar Isroil Livan va Eron hududlariga zarbalarni davom ettirsa, Tehron mintaqadagi davlatlarga, jumladan Isroilga qarshi harbiy harakatlarni davom ettirishini bildirgan.
Ma’lumotlarga ko‘ra, 8-aprel kuni vositachilar Eron va AQSh o‘rtasida o‘tkazilishi mumkin bo‘lgan uchrashuvning yakuniy tafsilotlarini muhokama qilgan. Uchrashuv 10-aprel kuni Islomobodda o‘tkazilishi mumkin.
Mahalliy OAV ham Eron sulh shartlarini qayta ko‘rib chiqayotganini tasdiqlamoqda. Tasnim axborot agentligi xabariga ko‘ra, agar Isroil Livanga zarbalarni davom ettirsa, Tehron AQSh bilan tuzilgan sulh bitimidan chiqishi mumkin.
Isroil armiyasi esa Bayrut, Bekaa vodiysi va Livan janubidagi hududlarda 100 dan ortiq nishonga zarba berilganini ma’lum qilgan. Bu Livandagi hozirgi harbiy harakatlar boshlangandan buyon eng yirik muvofiqlashtirilgan hujumlardan biri sifatida baholanmoqda.
Livan rasmiylarining ma’lum qilishicha, Isroil hujumlari oqibatida kamida 1530 kishi halok bo‘lgan, 4812 kishi jarohat olgan. Mahalliy aholi esa zarbalar tinch aholini evakuatsiya qilish bo‘yicha odatiy ogohlantirishlarsiz amalga oshirilganini bildirgan.
Shuningdek, mintaqada keskinlik ortib borayotgani fonida Quvayt, BAA va Bahrayn Eron tomonidan amalga oshirilgan yangi raketa va dron hujumlari haqida ham xabar berdi. Ayrim zarbalar neft, energetika va tuzsizlantirish infratuzilmasiga qaratilgani aytilmoqda.
Neft sanoati manbalariga ko‘ra, Saudiya Arabistonining sharqdan g‘arbga, Qizil dengiz tomon olib boruvchi muhim quvur liniyasi ham zararlangan bo‘lishi mumkin. Hozirda yetkazilgan zarar miqdori baholanmoqda.
