Navoiy IESda 870 mln. kubmetr tabiiy gaz zaxirasini tejash imkoniyati yaratiladi
Shuningdek, yiliga qo‘shimcha 4,8 milliard kilovatt-soat elektr energiyasi, 200 Gkal issiqlik energiyasi ishlab chiqariladi.
Navoiy issiqlik elektr stansiyasida 650 MVt quvvatli uchinchi bug‘-gaz qurilmasini qurish bo‘yicha yirik investitsiya loyihasi amalga oshirilmoqda.
Ma’lum qilinishicha, ayni paytda qurilish ishlarida 2400 dan ortiq mutaxassis ishtirok etmoqda. Ularning asosiy qismini mahalliy kadrlar tashkil etgan holda, texnik ishlarga xorijiy muhandis-texnik mutaxassislar ham jalb qilingan. Obyektda shuningdek. 200 dan ziyod maxsus texnika vositalari ishga solingan.
Loyiha doirasida boshqaruv binolari, gaz va bug‘ turbinalari, generatorlar, qozon-utilizator, suv sovutish minorasi hamda boshqa asosiy va yordamchi inshootlar barpo etilmoqda. Qurilmalar sifati va ishonchliligini ta’minlaydigan Yaponiya, Xitoy, Hindiston va Koreya kabi davlatlarda ishlab chiqarilgan zamonaviy uskunalar o‘rnatilmoqda.
Yaponiyaning "Mitsibushi Corporation" va "Mitsibushi Power Ltd." kompaniyalari konsorsiumi loyihaning bosh pudratchisi, Turkiyaning “Çalik Enerji" kompaniyasi subpudratchi sifatida ishtirok etishmoqda.
Ushbu zamonaviy bug‘-gaz qurilmasi ishga tushirilgach, yiliga qo‘shimcha 4,8 mlrd. kilovatt-soat elektr energiyasi hamda 200 Gkal issiqlik energiyasi ishlab chiqarish va 870 mln. kubmetr tabiiy gaz zaxirasini tejash imkoniyati yaratiladi.
Mutaxassislar ta’kidlashicha, mazkur loyiha mamlakat energetika xavfsizligini mustahkamlash, aholi va iqtisodiyot tarmoqlarini barqaror elektr energiyasi bilan ta’minlashda muhim ahamiyatga ega.
