O‘zbekiston Yaqin Sharqda sulh o‘rnatilishini olqishlaydi — O‘zbekiston TIV
Tashqi ishlar vazirligi tomonlarni tinchlik va barqarorlikka erishish maqsadida konstruktiv hamkorlikni davom ettirishga chaqirdi.
O‘zbekiston Tashqi ishlar vazirligi Pokiston vositachiligida Yaqin Sharqda o‘t ochishni to‘liq to‘xtatish va sulh o‘rnatilgani haqidagi xabarni ijobiy baholadi. Bu haqda vazirlikning rasmiy bayonotida ma'lum qilindi.
Bayonotda qayd etilishicha, mazkur sa’y-harakatlar keskinlikni yumshatish, siyosiy-diplomatik muloqot va o‘zaro maqbul yechimlarni topish uchun sharoit yaratish yo‘lidagi muhim qadam hisoblanadi.
Shuningdek, vazirlik barcha tomonlarni vazmin bo‘lishga, vaziyatni yana keskinlashuviga olib kelishi mumkin bo‘lgan harakatlardan tiyilishga, tinchlik va barqarorlikka erishish maqsadida konstruktiv hamkorlikni davom ettirishga chaqirdi.
“O‘zbekiston mojarolarni faqat tinch yo‘l bilan, Birlashgan Millatlar Tashkiloti Nizomi tamoyillariga muvofiq qat’iy ravishda hal etish zarurligi to‘g‘risidagi o‘zgarmas pozitsiyasini tasdiqlaydi”, deyiladi bayonotda.
