Qozog‘istondan O‘zbekistonga avtomobilda qatnov vaqti qisqarishi mumkin
Qozog‘istonning Turkiston viloyatida Sariag‘ashni aylanib o‘tuvchi yo‘l qurilmoqda.
Qozog‘istonning Turkiston viloyatida Sariag‘ashni aylanib o‘tuvchi yo‘l qurilishi shahar yuklamasini kamaytirib, O‘zbekistonga tranzitni tezlashtirishi kutilmoqda. Bu haqda Qozog‘iston Vazirlar mahkamasi xabar berdi.
Ma’lum qilinishicha, mazkur aylanma yo‘l tranzit transportni shahar tashqarisiga chiqarish, shahar yo‘l tarmog‘iga tushadigan yuklamani kamaytirish va O‘zbekiston yo‘nalishida harakatni sezilarli darajada tezlashtirish imkonini beradi.
Loyiha 102,6 kilometr uzunlikdagi, to‘rt polosali harakatga ega I-a texnik toifadagi zamonaviy avtomobil yo‘lini qurishni nazarda tutadi. Yo‘l zamonaviy xalqaro standartlarga mos bo‘lib, transport vositalarining uzluksiz va xavfsiz harakatlanishi uchun sharoit yaratadi.
Xabarga ko‘ra, joriy yilda “Shimkent – Qizilo‘rda” avtomobil yo‘lida umumiy uzunligi 103 km bo‘lgan yana 5 ta o‘rta ta’mirlash loyihasini amalga oshirish rejalashtirilgan.
Ushbu loyihalarning kompleks amalga oshirilishi zamonaviy va xavfsiz yo‘l tarmog‘ini shakllantirib, hududda transport xizmatlari sifatini yaxshilaydi hamda Qozog‘istonning Markaziy Osiyodagi tranzit salohiyatini kuchaytiradi.
