Telegram bir kunda 100 mingdan ortiq kanal va guruhni blokladi
2026-yil boshidan buyon messenjer qariyb 12 million hamjamiyatni yopgan.
Telegram messenjeri bir kun ichida 100 mingdan ortiq kanal va guruhni blokladi. Bu haqda messenjerning rasmiy statistik ma’lumotlarida qayd etilgan.
Ma’lumotlarga ko‘ra, 7-aprel kuni platformada 100 700 dan ortiq kanal va guruh faoliyati to‘xtatilgan. Avvalroq ham bunday ko‘rsatkich 100 mingdan oshgani qayd etilgan bo‘lib, bunday holat so‘nggi bor 17-mart kuni kuzatilgan.
Statistikaga ko‘ra, 2026-yil boshidan buyon Telegram jamoasi deyarli 12 million kanal va guruhni bloklagan. Ularning katta qismi platforma qoidalarini buzganligi sababli yopilgan.
Xususan, 154 798 ta kanal va guruh jinsiy mazmundagi materiallarni tarqatgani uchun, 53 939 ta hamjamiyat esa zo‘ravonlik va terrorizmni targ‘ib qilgani sababli bloklangan.
Shuningdek, yil boshida platformada keng ko‘lamli moderatsiya ishlari olib borilgan. Yanvar oyida kuniga 300 mingdan ortiq, fevral oyida esa 230 mingdan ortiq kanal va guruh bloklangan.
Ta’kidlanishicha, 2025-yilda Telegram jamoasi 44 milliondan ortiq hamjamiyatni bloklagan bo‘lib, bu ko‘rsatkich 2024-yilga nisbatan qariyb 2,7 baravar ko‘p ekani qayd etilgan.
