Xitoy vositachiligida Afgʻoniston va Pokiston keskinlikni yumshatishga kelishdi

 

Xitoy vositachiligida Urumchi shahrida o‘tkazilgan maslahatlashuvlar yakunida Afgʻoniston va Pokiston o‘rtasidagi keskinlikni yumshatish bo‘yicha kelishuvga erishildi. Bu haqda Xitoy Tashqi ishlar vazirligi rasmiy vakili Mao Ning ma’lum qildi deydi TASS.

 

Unga ko‘ra, 1–7 aprel kunlari Urumchi shahrida Xitoy, Afgʻoniston va Pokiston vakillari ishtirokida bir qator norasmiy uchrashuvlar bo‘lib o‘tgan. Muzokaralarda diplomatik, mudofaa va xavfsizlik idoralari vakillaridan iborat idoralararo delegatsiyalar qatnashgan.

 

Tomonlar mavjud kelishmovchiliklarni muloqot va maslahatlashuvlar orqali hal qilishga sodiqliklarini yana bir bor tasdiqlab, vaziyatni keskinlashtirishi mumkin bo‘lgan harakatlardan tiyilish bo‘yicha kelishib olgan.

 

Shuningdek, maslahatlashuvlar davomida delegatsiyalar Afgʻoniston–Pokiston munosabatlaridagi muammolarni kompleks tarzda hal etish yo‘llarini muhokama qilib, ustuvor e’tibor talab etadigan asosiy masalalarni aniqlab olgan.

 

Mao Ning ta’kidlashicha, “Urumchi jarayoni” doirasida tomonlar yuzaga kelgan muammolarni hal etishning eng real yo‘li sifatida aynan muloqot va diplomatik vositalarni tan oldilar. Xitoy esa mintaqada tinchlik va barqarorlikni ta’minlash maqsadida muloqot uchun platforma yaratishda hamda amaliy hamkorlikni mustahkamlashda yordam berishda davom etadi.

 

Eslatib o‘tamiz, 26-fevral kuni Pokiston–Afgʻoniston chegarasi hududida yana qurolli to‘qnashuvlar yuz bergan edi. Kobul Pokiston tomonidan Afgʻoniston hududiga uyushtirilgan havo hujumlariga javoban harbiy operatsiya o‘tkazayotganini ma’lum qilgan.